सुनानं माया मयाः धकाः आत्महत्या

यल – यलया बाग्मति गाउँपालिका–२ माल्टाया छम्ह मचां वंगु शनिवाः बहनी सुसाइड नोट च्वयाः आत्महत्या याःगु दु । कालिदेवी माध्यमिक विद्यालयय् न्यागू तगिमय् ब्वनाच्वंम्ह समिर लुङवां छेँजःपिं व विद्यालयया शिक्षकपिंसं थःत माया मयाः धकाः सुसाइड नोट च्वयाः आत्महत्या याःगु खः ।

महानगरीय प्रहरी वृत्त वादेया कथं मचां छेँय् मांम्ह मदुगु इलय् सुसाइड नोट च्वयाः आत्महत्या याःगु खः । मचां आत्महत्या याःगु बारे अनुसन्धान जुयाच्वंगु व मचाया सीम्ह पोष्टमार्टमया निंतिं पाटन अस्पताल छ्वःगु दु ।

मचां थःगु सुसाइड नोटय् ‘जिगु नां समिर लुङवा खः, जि न्यागू तगिमय् ब्वनाच्वना, जिगु रोल नम्बर ५ खः, थौं जिं छुं खँ धाये चाहे जू, जि तसकं दुःखय् दु, जितः सुनां नं माया याइ मखु, कक्षाय् मिजं मस्तय्त दाइगु, मिसा मस्तय्त दाइ मखु व छेँ जितः दाजु व तताःजुं हेला याइगु, छुं सर मिसपिं मजिउ उमिगु नां च्वयाच्वना, सरस्वती मिस, दिवाकर सर, गोविन्द सरं जिं विरामी जुयाच्वंगु इलय् जि विरामी मजू धाइगु, थुलि धयाः विदा फ्वने, जि झिंछदँ दत, जि बूगु कार्तिक १४ गते खः ।’