सत्यनारायण बहादुरयात लुमंकल

यल (नेपालभाषा टाइम्स)- नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया १०७ दँ बुन्हि हंगु दु । नेवाः पत्रकार राष्ट्रिय दबूया ग्वसालय् बुधवाः यलया ज्वागलय् जूगु ज्याझ्वलय् संस्थापक अध्यक्ष श्रेष्ठया किपाय् स्वामां देछासें वय्कःयात लुमंकूगु खः ।

ज्याझ्वलय् न्ववासें मधेस पत्रकार समाजया अध्यक्ष मोहन सिंहं नेपाल पत्रकार महासंघय् अध्यक्ष जुया वइपिं लिसें पदाधिकारीपिंसं श्रेष्ठं हे महासंघया संस्थापक अध्यक्ष जूगु स्वीकार याःसां संस्थागत रुपं धाःसा निर्णय यायेत अझं अलमल यानाच्वंगु द्वपं बियादिसें आः श्रेष्ठयात न्याय बिइगु निंतिं महासंघं थप दबाब बीमाःगु खँ धयादिल । अथेहे नेपाल जनजाति पत्रकार महासंघ (फोनिज)या प्रतिनिधि अमरध्वज लामां जनजाति पत्रकारत सकसिनं श्रेष्ठयात हे महासंघया संस्थापक अध्यक्ष माने यायेधुंकूगु धासें फोनिजया दुजः संघतय्सं थःथःपिनिगु ज्याझ्वलय् श्रेष्ठयात पत्रकार महासंघया संस्थापक कथं हे लुमंका वयाच्वंगु दु धयादिल ।

श्रेष्ठं वि.संं २००८ सालय् हे पत्रकारतय्त संगठीत यायेगु ताः तयाः दकलय् न्हापां नेपाल पत्रकार संघ स्थापना यानाः अध्यक्ष जुयादीगु खः । तर नेपाल पत्रकार महासंघं धाःसा कांग्रेस नेता कृष्णप्रसाद भट्टराईयात संस्थापक अध्यक्ष नाला वयाच्वंगु दु । थुकिया विरोधय् नेवाः पत्रकार राष्ट्रिय दबुलिं निरन्तर दबाब बिया वयाच्वंगु खँ दबूया केन्द्रीय नायः सुरजवीर वज्राचार्यं धयादिल ।

ज्याझ्वलय् दबूया तःमुँज्याया निंतिं दयेकूगु नेवाः पत्रकारतय् राष्ट्रिय म्ये नं सार्वजनिक याःगु खः ।