ने. सं. ११४४ कौलाथ्व एकादशी - चालं

बागमती प्रदेशय् भाषा विधेयक पारित, नेपालभाषा व तामाङ भाषायात प्रदेशय् सरकारी मान्यता

येँ (नेपालभाषा टाइम्स)- बागमती प्रदेशया संसदं नेपालभाषा व तामाङ भाषायात नं प्रदेश सरकारया ज्याखँ (कामकाजी) या भाषा जुइ धकाः पेश याःगु विधेयक सर्वसम्मतं पारित याःगु दु । सरकारपाखें उद्योग, पर्यटन तथा सहकारी मन्त्री पुकार महर्जनं म्हीगया संसद बैठकय् थ्व विधेयक पेश यानादीगु खःसा उकियात संसदया सर्वसम्मतं पारित याःगु खः ।

‘प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक, २०८०’ नां तयातःगु थ्व विधेयक पारित जुइवं आः बागमती प्रदेश दुने खस नेपालीया नापनापं नेपालभाषा व तामाङ भाषायात नं सरकारी मान्यता प्राप्त जूगु दु ।
नेपालय् भाषा सम्बन्धी खँयात जक कयाः बिस्कं कानुन हे तर्जुमा जुयाः लागू जुइत्यंगु थ्वहे न्हापांखुसी खः । उकिं थुकियात भाषा आन्दोलनया छगू ऐतिहासिक उपलब्धीया रुपय् कयाहःगु दु ।

म्हीग संसदं थ्व विधेयक पारित याःसां व्यवहारय् उकियात लागू याकेगु ज्या धाःसा मेगु खुला लिपा जक जुइगु खँ धाःगु दु । आः कानुन पारित जुइधुंकाः उकियात कार्यान्वयन यायेगु लागिं आवश्यक ज्याखँ यायेत खुलाया ई मालीगु जूगुलिं खुला लिपा जक थ्व कार्यान्वयन जुइत्यंगु खः ।

नेकपा (एकीकृत समाजवादी) या प्रदेश सांसद बसन्त मानन्धरं कनादीकथं तयारीया लागिं सरकारं खुलाया ई काःगु खः । वय्कलं धयादिल, ‘थ्व व्यवहारिक प्रयोगया लागिं जक ई काःगु खः । सैद्धान्तिक रुपं धाःसा थुकी छुं हे समस्या मंत ।’
सरकारं पेश याःगु विधेयकयात अझ क्वातुकेगु लागिं थीथी सांसदतय्सं उकी संशोधन प्रस्ताव नं दर्ता याःगु खः । संशोधन प्रस्तावया आधारय् आः प्रदेश दुने नेपाल संवत् व

मञ्जुश्री संवत् (तामाङ समुदायय् प्रचलित) नं छ्यलाबुलाय् हइगु जूगु दु ।
निगुलिं भाषाय् छ्यलाबुलाय् वइगु लिपियात नं संवद्र्धन याना यंकेगु खँ विधेयकय् उल्लेख जूगु दुसा भाषाया विकास याना यंकेत प्रतिष्ठान गठन यायेगु खँ नं दुथ्याःगु दु ।

थाय्थासय् मत च्याकाः दीपावली
बागमती प्रदेश संसदं नेपालभाषा व तामाङ भाषायात सरकारी मान्यता दइकथंया कानुन पास याःगु लसताय् म्हिगः थीथी थासय् मत च्याकाः दिपावली यायेगु ज्या जुल । थ्व लसताय् म्हिगः नेवाः देय् दबू, येँ महानगर १५ वडा कचापाखें स्वयम्भूया भगवान पालिइ मत च्याकाः दिपावली याःगु खः । अथे हे देय् दबूया २५ व २७ वडा कचापाखें असनय् मत च्याकाः दिपावली याःगु खः ।

नेपाल समाजवादी आदिवासी जनजाति महासंघपाखें थ्वहे लसताय् थौं बुधवाः सनिलया ५ बजे शंखधर पार्क तक दीपयात्रा यायेगु निर्णय याःगु दु । थनया मरु सतलं थ्व यात्रा शुरु जुइ ।

अथे हे नेवाः देय् दबू स्वनिगः विशेष समितिपाखें कन्हय् विहीवाः छगू भेला यासें थ्व ऐन पारित यायेगु ज्याय् ग्वाहालि याःपिं सकलें खलः, पुचः व व्यक्तियात सुभाय् देछायेत्यंगु दु । लिसें थुकिया लागिं प्रदेशया मुख्यमन्त्रीयात नं सुभाय् देछायेगु निर्णय याःगु दु ।

थ्वहे लसताय् कन्हय् प्रदेशया राजधानी हेटौंडाय् नं नेवाः देय् दबू बागमती प्रदेश कमिटीपाखें छगू लसता ¥याली पिकायेगु तयारी जुयाच्वंगु खँ प्रदेश कमिटीया नायः बिष्णुगोपाल महर्जनं कनादीगु दु ।