ने. सं. ११४४ कौलाथ्व तृतीया -

बालेन साहयात सर्वोच्चया आदेश –सिंहदरवारया फोहोर मुना छ्व

येँ (नेपालभाषा टाइम्स)- थःपिनि ज्याय् सरकारं ग्वाहालि मयाः धकाः सिंहदरवारया फोहोर ममुंसे च्वनाच्वंगु येँ महानगरपालिकायात आः वइगु स्वन्हुया दुने सिंहदरवारया फोहोर मुना यंकि धकाः सर्वोच्च अदालतं आदेश बिउगु दु ।

सवोच्च अदालतया न्यायाधीश प्रकाशमान सिंह राउतया एकल इजलाशं म्हिगः थ्व आदेश जारी याःगु खः । सिंह दरवारया फोहोर मुना मयंकूगु खँयात कयाः अधिवक्ता पदमबहादुर श्रेष्ठं सर्वोच्चय् थ्व रिट तःगु खः ।

सर्वोच्चया थ्व आदेश लिपा येँ महानगरया मेयर बालेन साहयात हानं मेगु छगू कानुनी झट्का लाःगु दु । थ्व स्वयां न्ह्यः वय्कःयात तुखुचा खुसि उलेगु ज्या, सुुकुम्बासी चीकेगु ज्या, नर्भिक अस्पतालया क्यान्टिन थुनेगु ज्या आदि सवालय् नं सर्वोच्चया आदेशं रोक याना बिउगु खः ।

सर्वोच्चं म्हिगः जारी याःगु आदेशय् संविधानं सरसफाई व फोहोर व्यवस्थापन यायेगु जिम्मा स्थानीय तहयात बियातःगु जूगुलिं फोहोर संकलन व उकिया विसर्जन यायेगु ज्यापाखें महानगरपालिका विमुख जुइ दइ मखु धकाः नं सचेत याःगु खः ।

हरेक नागरिकया स्वच्छ व स्वस्थ वातावरणय् म्वाये दइगु अधिकार दु धासें वातावरण प्रदुषण जुल धाःसा थुकिं सकसितं लिच्वः लाकीगु व महामारी न्यना वने फइगु खँय् नं सर्वोच्च अदालतं मनपाया ध्यानाकर्षण याःगु दु ।

मनपाया मेयर बालेन साहं वंगु वालय् सामाजिक सञ्जालय् छगू स्टाटस च्वयाः सिंहदरवार लगयात शितल निवासय् तकं फोहोर मुनेगु ज्या बन्द याःगु खःसा उकियात कयाः आपालं चर्चा जुयाच्वंगु दु ।