सर्वोच्चया फैसला पालना याकेत सडक विस्तार पीडितपाखें हानं आन्दोलन

येँ – स्वनिगःया सतक विस्तार पीडिततय्सं आः हानं संघर्षया ज्याझ्वः न्ह्याकीगु जूगु दु । म्हिगः पीडित संघर्ष समितिया दुजःतय् दथुइ च्वंगु मुँज्यां आः हानं थःपिं सतकय् हे कुहां वनेगु निर्णय यासें सतक आन्दोलनया ज्याझ्वः समेत तयार याःगु खँ सीदुगु दु ।

थौं हे छगू पत्रकार सम्मेलन यासें संघर्षया ज्याझ्वः नं सार्वजनिक यायेत्यंगु दु । ज्याझ्वःया पूर्ण खाका पत्रकार सम्मेलनय् हे पित बीगु खँ संघर्ष समितिया नायः सुमन साय्मिं ‘नेपालभाषा टाइम्स’ यात कनादिल ।

सडक विस्तारया बारे सर्वोच्च अदालतं याःगु फैसलाया पूर्ण पाठ पिहां वयेधुंकाः नं उकियात कयाः सरकार व उपत्यका विकास प्राधिकरणं थुकिया बारे छुं पलाः मल्ह्वंगु व सर्वोच्चया फैसलाया सम्मान नं मयाःगु कारणं उकिया विरोधय् आन्दोलन यायेमाःगु खँ संघर्ष समितिं धाःगु दु ।

सर्वोच्च अदालतं यदि सतक विस्तार यायेगु खःसा ऐन कथं जग्गा अधिकरण याये माःगु व उकिया लागिं सम्बन्धित पीडितलिसे च्वनाः मुआब्जा निर्धारण यायेमाः धकाः फैसला याःगु खः । तर सरकारं आः तक थ्व पैmसलाया कार्यान्वयन मयासे अःखतं बाँकी थासय् नं सतक विस्तारया ज्या न्ह्याकेत्यनागु दु, मुआब्जा काः वा धकाः सार्वजनिक सुचं पिकाःगुलिं थ्व सर्वोच्च फैसलाया अवज्ञा खः धाःगु दु ।

संघर्ष समितिं आः याइगु आन्दोलनं सर्वोच्च अदालतं याःगु थ्व फैसलाप्रति केन्द्र, प्रदेश व स्थानीय सरकारया समेत ध्यानाकर्षण यायेगु खँ धाःगु दुु । थ्व फुक्क हे तहया सरकारयात सर्वोच्चं याःगु फैसलाया जानकारी यासें कार्यान्वयनया लागिं ध्यान सालेत आन्दोलन यायेत्यनागु खँ धाःगु दु ।

सम्बन्धित बुखँ

LEAVE YOUR COMMENTS