खुसिबालं ५८ म्हेसिया ज्यान वन
येँ- वंगु सोमवाःनिसें देय्न्यंकं थीथी थासय् वःगु खुसिबाः व चलखय् लानाः आः तकया दुने ५८ म्ह मनूया ज्यान वनेधुंकूगु दु । चलखय् लानाः १ नम्बर प्रदेशय् ३० म्ह, बागमति प्रदेशय् छम्ह, कर्णाली प्रदेशय् ७ म्ह व सूदुरपश्चिम प्रदेशय् २० म्ह सीगु खँ नेपाल प्रहरीं धाःगु दु ।
उकथं हे १ नम्बर प्रदेशय् १४ म्ह व कर्णाली प्रदेशय् छम्ह यानाः झिंन्याम्ह घाःपाः जूगु दुसा चलखय् लानाः ३ नम्बर प्रदेशय् स्वम्ह व सूदुरपश्चिम प्रदेशय् २३ म्ह यानाः २६ म्ह मनूत बेपत्ता जुयाच्वंगु दु । अथे हे खुसिबालं १०२८ खा छेँय् डुबानय् लाःगु दुसा १०५० परिवार विस्थापित जूगु दु ।
खुसिबालं यानाः देय्न्यंकं कृषि ख्यलय् तःधंगु क्षति लाकूगु दु । वा लयेत तयारी जुइधुंकूगु वा पिनातःगु थासय् खुसिबाः वयाः आपालं क्षति याःगु दु । गुकिया कारणं यानाः आपालं किसानत चिन्तित जुयाच्वंगु दु । यक्व थासय् वा बालीया नापं स्वन्तिया लागिं पिनातःगु स्वां व तरकारी वाली नां सखाप जूगु दु ।
थ्वहे झ्वलय् सरकारं खुसिबालं सीपिनिगु छेँजःपिंत २ लाख तका राहत बीगु जूगु दु । म्हिगः च्वंगु मन्त्रिपरिषद् बैठकं सीपिनिगु छेँजःपिंत राहत बीगु घोषणा याःगु खँ सरकारया प्रवक्ता लिसें सञ्चार मन्त्री ज्ञानेन्द्रबहादुर कार्कीं कनादीगु दु । उकथं हे छखा हे छेँजःपिं छम्ह स्वयां अप्वः सीगु दुसा थप छगू लाख तक राहत बीगु निर्णय नं जूगु दु ।
अथे हे च्वनेगु थाय् नष्ट जुयाः खाद्यान्न तकं मदुगु न्याम्ह दुजः दुगु छेँेजःपिंत १५ हजार तका व वयां अप्वः छेँजः दुपिंत २० हजार तक नगद ग्वाहालि यायेगु निर्णय याःगु दु । मन्त्री कार्कीया कथं खुसिबाः व चलखय् लानाः घाःपाः जूपिंत सरकारं वासः यायेगु निर्णय याःगु दु ।
LEAVE YOUR COMMENTS