शरणार्थी काण्डवालाया पक्षं वहस मयाइगु

येँ (नेपालभाषा टाइम्स)- नक्कली भुटानी शरणार्थी प्रकरणय् दुथ्याःपिं अभियुक्ततय् पक्षय् वरिष्ठ कानुन व्यवसायीतय्सं बहस मयाइगु जूगु दु । म्हिगः वरिष्ठ कानुनी व्यवसायीतय्सं थवंथवय् सहलह यासें थ्व सम्बन्धी भ्रष्टाचार मुद्दाय् थःपिं सुना नं वहस मयायेगु भद्र सहमति याःगु खः ।

सीदु कथं वरिष्ठ अधिवक्ता शम्भु थापा, चण्डेश्वर श्रेष्ठ, डा. चन्द्रकान्त ज्ञवाली व टिकाराम भट्टराई लगायतया वरिष्ठ कानुनविद्तय्सं थुकी वहस मयायेगु निर्णय याःगु खः । नेपाःया संविधानय् गुगुं नं मुद्दाय् द्वपं फयाच्वंपिंसं कानुन व्यवसायीतय्गु व थःगु पक्षं वकालत याकेगु हकयात मौलिक हकय् तयातःगु दु ।

थ्वहे झ्वलय् नक्कली भुटानी शरणार्थी प्रकरणय् बिसिउँ वनाच्वंम्ह लक्ष्मी महर्जनयात प्रहरीं म्हिगः ज्वंगु दु । महर्जनयात म्हिगः हे जिल्ला अदालत येँय् उपस्थित याकूगु खः । थ्व प्रकरणय् ज्वंपिं आः झिंन्हय्म्ह थ्यंगु दु । उकथं हे नक्कली भुटानी शरणार्थी प्रकरणय् ज्वंपिंत म्हिगःनिसें येँया जिल्ला अदालतय् बयान कायेगु ज्या शुरु जूगु दु ।