डब्लुएनओया सिद्धिदास बुन्हिया लसताय् ज्याझ्वः
येँ(नेपालभाषा टाइम्स)÷ वल्र्ड नेवाः अर्गनाइजेसन (डब्लुएनओं) महाकवि सिद्धिदास महाजुया १५६ क्वःगु बुन्हिया लसताय् वय्कःया कृतियात विषययात कयाः खँल्हाबल्हा मुँज्या ज्याझ्वः याःगु दु । महाकवि सिद्धिदास बुन्हिया लसताय् जूम प्रविधिया माध्यमं भर्चुअल रुपं उगु ज्याझ्वः जूगु खः ।
ज्याझ्वलय् प्रा. प्रेमशान्ति तुलाधरं महाकवि सिद्धिदास महाजुया खण्डकाव्य ‘सत्यसती’यात कयाः नुगःखँ तयादीगु खः । वय्कलं महाकवि सिद्धिदासया सत्यसती खण्डकाव्य नेपालभाषा साहित्य ख्यलय् हे मास्टरपिस जूगु धासें वय्कःया उगु कृति थौया परिवेशय् उलि हे महत्वं जाःगु खँ धयादिल ।
नेपालभाषा केन्द्रीय विभागया उपप्राध्यापक जीवनकुमार महर्जनं महाकवि सिद्धिदासया मेगु कृति ‘सज्जनहृदयाभरण’यात कयाः नुगःखँ तयादीगु खः । महाकवि सिद्धिदासं सज्जनहृदयाभरण खण्डकाव्यय् थम्हं फयेमाःगु आर्थिक व छेँजःपाखें समस्या व पीडाबोधयात गुकथं ब्वयातःगु दु धइगु बारे कनादीगु खः ।
लोककवि राजभाई जकःमिं महाकवि सिद्धिदासया पिदंगु थीथी कृतिया बारे म्हसीका बियादिसें सिद्धिदासया लुमन्तिइ च्वयातःगु न्यापु चिनाखँ ब्वनाः न्यंकादीगु खः ।
डब्लुएनओया नायः संयुक्त श्रेष्ठं ज्याझ्वःया उद्देश्ययात कयाः थःगु नुगःखँ तयादिसें सुभाय् देछानादीगु खः ।
LEAVE YOUR COMMENTS