
येँ – नेपालभाषा मंकाः खलः आः विधिवत सञ्चालनया निंतिं थीथी कवः नीस्वंगु दु । वंगु लाय् मंकाः खलःयात येँया जिल्ला प्रशासन कार्यालयय् दर्ता यायेधुंकाःलि थुकियात विधिवत सञ्चालनया लागिं थीथी कवः व उकिया कार्यविधि समेत तयार याःगु खः ।
वंगु लाय् जनकवि दुर्गालाल श्रेष्ठया अध्यक्षताय् न्हय्म्ह दुजः तयाः मंकाः खलः दर्ता यायेगु ज्या जूगु खः । मंकाः खलःया थ्व ज्यासना पुचःयात ग्वाहालि यासें तःमुँज्या (महाधिवेशन) सम्पन्न यायेगु लागिं आः थुकिया क्वं छगू सचिवालय (मू ज्याकू कवः) नं नीस्वंगु दु । थ्व सचिवालयय् नं न्हय्म्ह हे दुजः दु । उकी मंकाः खलःया केन्द्र व कचाय् च्वनाः ज्या यायेधुंकूपिं पुलांपिं पदाधिकारीपिं बालकृष्ण प्रजापति, रमेशमान पिया, भाइराजा तुलाधर, राजा शाक्य लिसें थीथी स्वंगू कवःया कजिपिं निरञ्जनरत्न शाक्य, अमेश वज्राचार्य व रविन साय्मि च्वनादीगु दु ।
सचिवालयया क्वय् ज्याझ्वः कवः, संगठन कवः व आर्थिक कवः यानाः स्वंगू कवः नीस्वंगु खः । निरञ्जनरत्न शाक्यया अध्यक्षताय् नीस्वंगु आर्थिक कवलय् ज्ञानेन्द्र मानन्धर, राजेन्द्रमान शाक्य व केदार चित्रकार दुजः कथं च्वनादीगु दु । रविन साय्मिया अध्यक्षताय् नीस्वंगु ज्याझ्वः कवलय् निरञ्जन ताम्राकार, महेशमान डंगोल, सुजिव वज्राचार्य व सुरेश किरण मानन्धर दुजः कथं च्वनादीगु दु । अथे हे अमेश वज्राचार्यया अध्यक्षताय् नीस्वंगु संगठन कवलय् नारद वज्राचार्य, प्रतापमान शाक्य व मनुदास श्रेष्ठ दुजः कथं च्वनादीगु दु ।
वंगु लाय् दर्ता जूगु मंकाः खलःया मू ज्यासना पुचलय् दुर्गालाल श्रेष्ठ नायः जुयादीगु खःसा मेपिं पदाधिकारीइ मल्ल के. सुन्दर, राजा शाक्य, गणेश साय्मि, डा. चुन्दा वज्राचार्य, मंगला कारंजित व किरण श्रेष्ठ च्वनादीगु खः ।
मंकाः खलःया ज्याकू क्षेत्रपाटीया चाकलाः दबू न्ह्यःने मदुम्ह भाजु रामहरिकृष्ण मानन्धरया छेँय् वय्कलं हे बियादीगु क्वथाय् तइगु जूगु दु ।
LEAVE YOUR COMMENTS