महरा बचे जुल, काय्यात मुद्दा लात

येँ (नेपालभाषा टाइम्स)÷विद्युतीय चुरोट (भेप) य् लुँ तयाः तस्करी याःगु अभियोगय् पुलांम्ह सभामुख कृष्णबहादुर महराया काय् राहुल महरा सहित स्वम्हेसित संगठित अवराध व भन्सार चोरी निकासीया द्वपनय् मुद्दा न्ह्याकेत केन्द्रीय अनुसन्धान ब्युरों जिल्ला सरकारी वकिलया कार्यालययात राय बिउगु दु ।

महराया काय् राहुल, तिब्बती मूलया बेल्जिमय नागरिक दावा छिरिङ व लुुँ तस्करीइ दुथ्याःम्ह चिनियाँ नागरिक दावजित वाङया सवारी चालक लोकेन्द्र पौडेल विरुद्ध मुद्दा न्ह्याकेत सीआईबीं राय बिउगु खः । थुकी लाः छम्ह नेपाःमि धाःसा बिसिउँ वनाच्वंगु दु ।

थ्वहे काण्डय् पुलांम्ह सभामुख महराया विरुद्ध धाःसां छुं मुद्दा न्ह्याकेम्वाःगु राय नं ब्युरों बिउगु दु । भेप प्रकरणय् प्रतिवादी दयेकूपिं विरुद्ध ८ करोड ५५ लाख तकाया बिगो कायम यानाः मुद्दा न्ह्याकेत राय बियातःगु दु ।

भेपया रुपय् हःगु वस्तु शंकास्पद लुइवं विमानस्थलया भन्सार कर्मचारीतय्सं उकियात ज्वंगु खःसा लिपा थ्व भेप त्वःतके पुलांम्ह सभामुख महरा व वया काय् राहुलं भन्सार अधिकृततय्त फोन यानाः दबाब बीवं थ्व काण्ड सार्वजनिक जूगु खः ।