ने. सं. ११४४ ञलाथ्व नवमी -

ठेकेदार ज्वनेवं भ्यु टावर ठप्प

येँया भ्यु टावर दयेकाच्वंम्ह ठेकेदार बैंक घोटालाय् ज्वन

येँ – पुलांगु बसपार्कय् दयेकाच्वंगु काठमाडौं टावर दयेकेगु ज्या ठप्प जूगु दु । उगु टावर दयेकाच्वंम्ह ठेकेदार हे बैंक घोटाला काण्डय् लाःगुलिं टावर दयेकेगु ज्या ठप्प जूगु खः । ठेकेदार कम्पनी जलेश्वर स्वच्छन्द विकोइ बिल्डर्सया प्रमुख मनोजकुमार भेटवालयात बैंक घोटला काण्डय् ज्वनेवं वंगु निवाः न्ह्यवंनिसें टावर दयेकेगु ज्या बन्द जूगु खँ २९ वडाया वडाध्यक्ष भाइराम खड्गीं ‘नेपालभाषा टाइम्स’ यात कनादिल ।

तर ठेकेदार कम्पनीं धाःसा आन्तरिक कारणं ज्या दिकाच्वंगु धकाः धयातःगु दु ।येँ महानगरपालिका व ठेकेदार कम्पनी दथुइ सार्वजनिक निजी साझेदारीइ अन २९ तल्लाया बहुउद्देश्यीय भ्यु टावर दयेकेगु सम्झौता जूगु खः । सम्झौता कथं विल्डर्सं निर्माण जुयाच्वंगु इलय् दँय् ९० लाख तका मनपायात पुलेमाःसा निर्माण क्वचायेधुंकाः दँय् ३ करोड तका पुलेमाः ।

भेटवालयात एपेक्स बैंक घोटाला काण्डय् ज्वंगु खः ।मेखे मनपां सूत्रं धाःसा भ्यु टावर दयेकेगु ज्यायात निरन्तरता बीत ठेकेदार कम्पनीयात निर्देशन बिउसां कम्पनीं छुं लिसः बियाच्वंगु मदु । कम्पनीं थःपिंसं ज्या दिकागु बारे छुं कारण नं मक्यँसे च्वनाच्वंगु दुसा मेखे मनपां नं ज्या न्ह्याकेत निरन्तर दवाव बियाच्वंगु दु ।

कम्पनीं ताः ई तक ज्या मयासें च्वनाच्वन धाःसा कानुनी कारबाही यायेमाली धकाः मनपां ख्याच्वः बीधुंकूगु दु । थुकिया बारे न्यनेकने यायेत येँ मनपाया मेयर विद्यासुन्दर शाक्ययात स्वापू तयाबलय् वय्कलं थःके नं थुकिया बारे पूवंक जानकारी मवःनिगु खँ कनादिल ।कम्पनीं वंगु आर्थिक दँय् पुलेमाःगु ९० लाख तका ध्यबा नं मपूगु खँ मनपा सूत्रं धाःगु दु ।

भेटवालं झापाया दमक नगरपालिका वडा नं. १७ य् च्वंगु ज्या लगे मजूगु जग्गा धितो तयाः बैंकं ध्यबा लिकाःगु खःसा व वहे सन्दर्भय् वयात ज्वंगु खः । भ्यु टावरया शिलान्यास धाःसा उपराष्ट्रपति नन्दकिशोर पुनं २०७२ कार्तिक २५ गते यानादीगु खः ।

स्थानीय जनता धाःसा विरोधय्

येँया पुलांगु बसपार्कय् दयेकाच्वंगु काठमाडौं भ्यू टावरयात उगु लागाया जःखः च्वंपिं स्थानीय जनतां धाःसा विरोध यानाच्वंगु दु । भुखाचं जोखिम थासय् लानाच्वंगु येँ देय्या दथुइ लाक्क अपाय्मछि जाःगु छेँ दनेबलय् कन्हय् अझ जोखिम जुइ धासें स्थानीय जनतां विरोध याःगु खः ।

वंगु तःभुखाय्या इलय् बसपार्कया उगु खुल्ला थासं आपालं मनूतय्त सुरक्षितपूर्वक च्वनेगु थाय् उपलब्ध याःगुलिं आः नं उगु थाय्यात खुल्ला हे त्वःतेमाः धासें स्थानीय जनतां मनपायात इनाप समेत याःगु दु । मनपाय् जनप्रतिनिधि निर्वाचित जुयाः वये न्ह्यः कर्मचारीपाखें सञ्चालन जुयाच्वंगु इलय् हे अन भ्यू टावर दयेकेगु सम्झौता जूगु खः ।