अमेरिकी विदेश मन्त्रीयात हाकुगु ध्वाँय्

येँ – दक्षिण तथा मध्य एसियाली मामिला सम्बन्धी अमेरिकी सहायक विदेशमन्त्री डोनाल्ड लु म्हिगः येँय् थ्यंकः वःगु दु । वय्कः म्हिगः येँय् थ्यनेवं लँय् हे वय्कःयात हाकुगु ध्वाँय् क्यनाः विरोध प्रदर्शन नं जूगु दु ।

सहायक विदेशमन्त्री लुया पुचः त्रिभुवन विमानस्थलं पिहां वयाः होटल– पाखे वनाच्वंगु इलय् गौशालाय् छपुचः मनूतय्सं वय्कः विरुद्ध नाराबाजी यासें हाकुगु ध्वाँय् क्यंगु खः । हाकुगु ध्वाँय् क्यंपिं सकलें नेत्रविक्रम चन्द पुचःया माओवादी कार्यकर्ता खः धाःगु दु ।

प्रदर्शन याःपिंत प्रहरीं हस्तक्षेप यानाः छम्ह मिसा सहित गुम्ह प्रदर्शनकारीयात ज्वना यंकूगु दु । ज्वंपिं सकसितं गौशाला प्रहरी चौकीइ कुने यंकूगु खः ।प्रदर्शनकारीतय्सं अमेरिकी मन्त्रीयात ‘एमसीसी बहिष्कार’ धकाः च्वयातःगु प्ले कार्ड ब्वयाः क्यंगु खः ।

अमेरिकी विदेशमन्त्री लु स्वन्हु च्वनेगु ल्याखं म्हिगः नेपाः थ्यंकः वःगु खः । वय्कलं थौं प्रधानमन्त्री शेरबहादुर देउवा व परराष्ट्रमन्त्री नारायण खड्कायात नापलाइगु ज्याझ्वः तयातःगु खँ सीदुगु दु । नेपालय् च्वंगु अमेरिकी दूतावासं लुया थ्व भ्रमण नियमति जूगु खँ धाःगु दु । नेपाः भ्रमणया झ्वलय् लुं अमेरिकी विदेशमन्त्रीपाखे दँय्दसं बिया वयाच्वंगु ‘अवार्ड फर कर्पोरेट एक्सिलेन्स’ नेपालय् च्वंगु अमेरिकी उत्पादनकर्तायात बीगु ज्याझ्वः नं दु ।

दूतावासया कथं भ्रमणया झ्वलय् सहायक मन्त्री लु व्यापार, नागरिक समाज व सरकारया नेतृत्व यानाच्वंगु पार्टीया नेतातय्त नापलाइगु ज्याझ्वः दु । थ्व स्वयां न्ह्यः तिनि वय्कलं वंगु मंसिरय् नेपाःया भ्रमण यानादीगु खः । उगु भ्रमणया इलय् मिलेनियम च्यालेन्ज कर्पोरेशन (एमसीसी) संसदं अनुमोदन याकेगु नितिं वय्कलं थीथी नेतातय्त नापलानाः गहम भूमिका म्हितादीगु खँ धाःगु दु । भाजु लु कन्हय् कतार एयरलाइन्सं लिहां वनीगु ज्याझ्वः दु ।