ने. सं. ११४६ बछलागा दशमी -

बाः उठे मजुयाः छेँथुवाः समस्याय्, सरकारं बालं च्वनीपिंत जक राहत बिउगु द्वपं

येँ (नेपालभाषा टाइम्स) – कोरोना भाइरसया कारणं व्यापार व्यवसाय बन्द जूगुलिं आपालं व्यवसायी व बालं च्वनीपिं मनूतय्सं थःपिंत छेँया बाः मिनाहा वा छुट यायेमाः धकाः माग यानाच्वंगु हे इलय् मेखे छेँय् बालं तयाच्वंपिं छेँथुवाःतय्गु नं थःगु हे कथंया समस्यात दुगु खँ सीदुगु दु । छेँय् बालं च्वनीपिंसं बाः मिनाहा याना बी माल धकाः थःपिंत धाः वयाच्वंसां नं थःपिंत धाःसा गनं नं राहत मवःगु जुयाः बाः मिनाहा याये फइगु अवस्थाय् थःपिं मदुगु खँ छेँथुवाःतय्सं धया हःगु दु ।

सामाखुसिया स्थानीय रचना खड्गीं थःपिंत सरकारं छुट बिउगु खःसा थःपिंसं नं बालं च्वंपिंत छुट बीगु खः तर सरकारं हे छुट मबिउगु जुयाः थःपिंसं जक गय् यानाः छुट बी फइ धकाः न्ह्यसः तयादीगु दु । वय्कलं धयादी, ‘जि जहान लकडाउन न्ह्यः तक सांग्रिला होटलय् जागिर नयाच्वंम्ह खः, लकडाउन धुनेवं वय्कःया जागिर मंत, आः जि म्वायेगु आधार धइगु बाः बाहेक मेगु मदु। जिं बाः मकायेगु खःसा बैंकया ब्याज सुनां पुली ?’

छखे जहानया जागिर मदुगु व मेखे बालं च्वंपिंसं नं इलय् बाः मबिउगु कारणं टेलिफोनया ध्यबा पुलेगु निन्हु स्वन्हु लिबायेवं फोनया लाइन हे चाना हःगु खँ न्ह्यथँसें वय्कलं न्ह्यसः तयादिल, ‘छेँय्थुवाः जुइवं ध्यबा बुया वइगु खःला ?’

अथे हे वय्कःया जहान रामकुमार खड्गीं नं लकडाउनया इलय् वडापाखें बिउगु राहत फुक्कं बालं च्वंपिंत वंगु व क्वथाया बाः छुट बीगु धकाः नं उमित हे राहत वंगु खँ न्ह्यथँसें घरपेटीतय्त छुं हे राहत म्वाःगु लाकि धकाः न्ह्यसः तयादिल ।

अथे हे न्हू सतक ओमबहालय् न्हूगु छेँ दनाच्वंम्ह स्थानीय अशोक शाहीयाथाय् नं छेँ दनाच्वँच्वं हे छम्ह व्यापारीं पसः बालं काः वःगु खः । वैशाख १ गतेनिसें पसः चायेकेगु धकाः बैना नं कायेधुंकल । तर चैतं हे लकडाउन जुइवं पसः चायेके मखन । ८० प्रतिशत ति डेकोरेसन यायेगु ज्या नं क्वचायेधुंकूगु खः । आः अथे पसः हे मचायेकूनिम्ह पसल्यायाके बाः फ्वनेगु लाकि मफ्वेगु धइगु द्विविधाय् थः लाःगु खँ शाहीं कनादिल । वय्कलं धयादी, ‘छतका दांया हे व्यापार मयाःनिम्ह मनूयाके गय् बाः फ्वनेगु? जिं ला बाः मकायेगु बिचाः याना ।’

तर बाः काये मखु धाःसां बैंकं धाःसा छेँ दनेत कयागु त्यासाया ब्याज पुले हजि धकाः धुवांधू फोन याना हयाच्वंगु दुःख नं वय्कलं प्वंकादिल । लकडाउन घोषणा जुइवं बालं च्वनीपिं मनूतय्त जूगु समस्याया सरकारं तुरुन्त सम्बोधन याःसां थनया स्थानीय छेँथुवाःतय् समस्यायात धाःसा सरकारं आः तक सम्बोधन मयाःगु खँय् नं आपालं गुनासो वःगु दु। बालं च्वनीपिं मनूत लकडाउन शुरु जुइ न्ह्यः हे छेँय् वंगु व उपिं आः तक लिहां मवःगु जुयाः बाः काये मखनाः छेँ खर्च चले यायेत तकं समस्या जूगु खँ ताहाचःया मेम्ह घरपतिं कनादिल ।