ने. सं. ११४४ कौलाथ्व पारू - नःलास्वनेगु

क्यानेडियन नेवाः गुथिया हनेज्या व समय्बजि ज्याझ्वः

येँ(नेपालभाषा टाइम्स)- क्योडियन नेवाः गुथिं नं यँयाः नखः तःजिक हंगु दु । गुथिं यँयाःया लसताय् समय्बजि ज्याझ्वःलिसें गुथिया ल्याय्म्ह दुजःपिंत हनेज्या नं याःगु खः ।
गुथिया ज्यासना पुचःया दुजः डा. कृष्ण कायस्थं लसकुस यासें गुथिइ ल्याय्म्हतय् सहभागिता आवश्यक जूगु चर्चा यानादिसें गुथिया ज्यासना पुचलय् ल्याय्म्हतय् प्रतिनिधित्व जुइगु व्यवस्था याये फुसा अझं बांलाःगु विचाः तयादिल ।

गुथिया ज्यासना पुचःया दुजःलिसें ल्याय्म्ह हना समितिया कजि डा. प्रज्वल प्रधानं नेवाः संस्का, संस्कृति, परम्परा बारे जानकारी याकाः उकिया संरक्षण, संवद्र्धन व प्रवद्र्धनय् ल्याय्म्हतय् सक्रिय सहभागिता दयेमा धइगु ल्याखं थुकथंया ज्याझ्वः यानागु जानकारी बियादिल ।

गुथिया नायः प्रकाश प्रधानं गुथिया ज्याझ्वलय् ल्याय्म्हतय् योगदानयात च्वछायादिसें थुकथं हनेज्या यायेखंगुलिं लसता प्वंकादिल । न्वकु उत्तम माकःजुं ल्याय्म्हत धइपिं भूत, वर्तमान व भविष्या प्रतीक खः धासें ल्याय्म्ह पुस्ताया सहभागिताया निंतिं माःकथंया वातावरण ब्वलंकेमाः धयादिल । लिसें वय्कलं नेवाः संस्कार, संस्कृति, परम्परा आधुनिक विज्ञानया उत्पत्ति जुइ स्वयां न्ह्यः हे अस्तित्वय् दुगुलिं थौं आधुनिक इलय् उकिया स्पष्ट ब्याख्या याये मफुगुलिं लोप जुइगु लँपुपाखे वनाच्वंगु विचाः तयादिल ।
मूछ्याञ्जे विमल श्रेष्ठं वंगु छुं दँ थुखे ल्याय्म्हतय् सहभागिताय् ज्याझ्वःत याना वयाच्वनागु खँ कनादिसें सन् २०१७–०१८य् ल्याय्म्हतय् व्यवस्थापनय् हे ओन्टारियोया नागरिकता व आप्रवास मन्त्रालयया ग्वाहालिइ नवआगन्तुकतय् निंतिं ज्याझ्वः न्ह्याकागु खँ कनादिल ।

ज्याझ्वलय् पाहांकथं झायादीम्ह नेप्लिज फेसन होमया हेमा मानन्धरं संस्कृति संरक्षणलिसें मिसा सशक्तिकरणया ज्याझ्वः नं संचालन यायेमाःगु खँय् बः बियादिसें थज्याःगु ज्याझ्वःया निंतिं थःपिंसं नं ग्वाहालि यायेगु जुइ धयादिल ।

ज्याझ्वलय् ल्याय्म्ह पुचःया दुजःपिं आयुश्ना श्रेष्ठं ‘क्यानाडाय् नेवाः संस्कृतिइ ल्याय्म्हतय् सक्रियताया महत्व’, मेम्ह दुजः कृष्टिना कायस्थं ‘नेवाः समुदायया महत्व’ विषयय् थःथःगु धारणा तयादीगु खः । ज्याझ्वलय् गुथिइ ल्याय्म्हतय् योगदानलिसें इमिगु शैक्षिक उपलब्धिया कदर यासें नायः, न्वकु व मूछ्याञ्जें दसिपौलिसें मतिनाया चिं लःल्हानादीगु खः ।

हनाज्या क्वचायेकाः सकलें मुनाः न्ह्यइपुक यँयाः नखः हंगु खः । उगु इलय् ज्याझ्वलय् ब्वति कयादीपिं सकसितं यँयाःया प्रमुख नसाज्वलं समय्बजि नकेगु ज्या जूगु खः । लिसें ज्याझ्वलय् नेवाः कला, संस्कृति, भाषा, नखःचखःया विषयय् केन्द्रीत न्ह्यसःलिसः कासाया नं ग्वसाः ग्वःगु खः । थुकथं हे ज्याझ्वलय् लाखे, पुलुकिसि प्याखं नं न्ह्यब्वःगु खः ।