भिन्तुना गुथिया वसन्त उत्सव झःझः धायेक क्वचाल

येँ – असंया थाकुलियात सम्मान यासें भिन्तुना गुथि, असंया भिन्तुना वसन्त उत्सव ज्याझ्वः झःझः धायेक क्वचाःगु दु ।
गुथिं शनिवाः येँया असनय् न्याक्वःगु भिन्तुना वसन्त उत्सव ज्याझ्वःया ग्वसाः ग्वसें असंया थाकुलि १०४ दँया मोतिकृष्ण तुलाधरयात हंगु खः । उगु हे ज्याझ्वलय् छुं दिं न्ह्यःतिनि क्वचाःगु स्थानीय तहया निर्वाचनय् येँ महानगरपालिका वडा ल्याः २५पाखें वडाअध्यक्ष निर्वाचित नीलकाजी शाक्य व वडा नम्बर २७ पाखें वडाअध्यक्षय् निर्वाचित चिनियाँमान बज्राचार्ययात नं हंगु खः । सम्मानित स्वम्हेसितं गुथिया संस्थापक नायः कृष्णमान तुलाधरं दोसल्लां न्ययेकाः हनादिलसा गुथिया वर्तमान नायः उपेन्द्रकाजी शाक्यं हनापौ लःल्हानादिल ।

ज्याझ्वलय् सम्मानित वडाध्यक्षद्वय शाक्य व बज्राचार्यं येँया प्राचीन बजार असंयात आः आधुनिकीकरणपाखे यंकुसें थुकिया पराम्परागत पहिचानयात नं ल्यंका तयेमाःगु धयादिल । येँया पर्याय थें हे जुयाच्वंगु थनया प्राचीन वस्ती असंया परम्परागत संस्कृति, सम्पदाया अध्ययन अनुसन्धान यासें थुकिया संरक्षण यायेगु नितिं थःपिं न्ह्याःवनेगु प्रतिवद्धता वडाअध्यक्षद्वय शाक्य ज बज्राचार्यं प्वंकादिल ।व स्वयां न्ह्यवः असंया थाकुलि १०४ दँयाम्ह मोतिकृष्ण तुलाधरं त्वाःदेवाय् मत च्याकाः ज्याझ्वःया औपचारीक उलेज्या यानादिइगु खः । ज्याझ्वलय् गुथिया नायः उपेन्द्रकाजी शाक्यं लसकुस यानादिल सा गुथिया छ्यान्जे अमुलकाजी तुलाधरं सुभाय् देछानादिल ।

ज्याझ्वलय् थीथी सांस्कृतिक न्ह्यब्वयाया लिसें कविता वाचन व ख्यालः नं न्ह्यब्वःगु खः । सांस्कृतिक न्ह्यब्वयाया झ्वलय् १५० दँ पुलांगु दाफा भजन, मृदंग भजन, ज्ञानमाला भजन, मोडर्न नेवाः इंगलिस स्कूलया विद्यार्थीपिनिगु हुलाप्याखं, जाय्ज संगीतय् कत्थक हुलाप्याखं नं न्ह्यब्वःगु खः । लिसें इमेज च्यानलया लोकंव्हाःगु नेपालभाषाया ज्याझ्वः समयबजि पुचःया ख्यालः, भीम तुलाधर, प्रवेशमान शाक्य लिसेंया लोकंह्वाःपिं म्येहालामिपिनिगु म्ये नं न्ह्यब्वःगु खः ।स्थानीय भाषा, कला, संस्कृतिया संरक्षणया लिसें स्थानीय न्हूपिं प्रतिभापिनिगु नितिं दबूया विकास यायेगु आज्जुं गुथिं भिन्तुना वसन्त उत्सव ज्याझ्वःया ग्वसाः ग्वया वयाच्वनागु ज्याझ्वः कजि विद्यासागर तुलाधरं जानकारी बियादिल । थुकिया लिसें गुथिं दँय्दसं नेपालभाषाया उत्थानय् योगदान बिउपिं भाषासेवीपिनिगु किपा कियातःगगु पाँय्म्वः नं पिथना वयाच्वंगु दु ।