कांग्रेस, माओवादी केन्द्र व जसपा गठबन्धनया तयारी

येँ – प्रधानमन्त्री केपी शर्मा ओली विरुद्ध अविश्वासया प्रस्ताव दर्ता यायेगु ज्याय् आः जनता समाजवादी पार्टीया भूमिका निर्णायक जुइगु जूगु दु । कन्हय् च्वनीगु जसपा कार्यकारिणी सभाया बैठकय् ओली विरुद्ध गुकथं न्ह्याःवनेगु धइगु बारे सहलह जुइगु खँ धाःगु दु ।
सूत्रया कथं जसपाया हे छुं नेतात ओलीया सरकारय् हे वनेमाः धकाः ओलीलिसे अनौपचारिक रुपं सतिनाच्वंगुलिं न्हूगु सरकार नीस्वनेत कांग्रेस व माओवादी केन्द्रयात निर्णय यायेत थाकुयाच्वंगु खँ धाःगु दु ।

सूत्रया कथं जसपा नेता महन्त ठाकुर प्रधानमन्त्री ओलीया समर्थनय् थःगु नेतृत्वय् सरकार गठन जुइगु सम्भावना दत धाःसा उकियात सकस्यां समर्थन यायेमाः धइगु पक्षय् दी । तर पार्टीया उच्च नेतृत्वं धाःसा प्रम ओलीं ल्ह्वंगु पलाः प्रतिगमनकारी जूगुलिं उकियात गुगुं हालतय् समर्थन याये फइ मखु धाःगुलिं माओवादी व कांग्रेस जसपाया निर्णय लिपा जक थःपिंसं निर्णय यायेत पियाच्वंगु खँ धाःगु दु ।
थ्वहे झ्वलय् कांग्रेसया सभापति शेरबहादुर देउवां जसपां छुं हे निर्णय मयाःगु कारणं सरकार गठन बारे थःपिंसं निर्णय याये मफयाच्वंगु खँ धयादीगु दु ।

मेखे माओवादी केन्द्रया नेता लिसें पुलांम्ह अर्थमन्त्री वर्षमान पुनं जसपाया ५ गते च्वनीगु कार्यकारिणी समितिया बैठक लिपा सत्ता समीकरण स्पष्ट जुइगु खँ धयादीगु दु ।

म्हिगः माओवादी केन्द्रया बैठक लिपा पत्रकारतलिसे खँ ल्हासें वय्कलं उगु खँ धयादीगु खः । नेता पुनं धयादिल, ‘कन्हय् जसपाया कार्यकारिणी कमिटीया बैठक लिपा स्वंगू दलया दथुइ सत्ता समीकरण बारे निर्णय जुइ ।’

वय्कलं माओवादी केन्द्र, कांग्रेस व जसपा प्रधानमन्त्री ओलीं ल्ह्वंगु पलाःयात असंवैधानिक खः धासें उकियात भिंकेमाः धकाः मंकाः कथं कुहां वःगु जूगुलिं आः निर्माण जुइगु थ्व गठबन्धन प्राकृतिक समेत जुइगु तर्क नं तयादीगु दु ।

सम्बन्धित बुखँ

LEAVE YOUR COMMENTS