नेपालभाषा मचा सिरपाःया निंतिं सहलह

येँ – नेवाः बस्ती नेवाः स्कुल अभियानया ग्वसालय् थगुनेनिसें न्ह्याः नेपालभाषा मचा सिरपाः थुगुसी नं जुइगु जूगु दु । अभियानया ग्वसालय् थुगुसी निक्वःगुखुसी जुइगु सिरपाःया निंतिं थीथी विद्यालयय् नेपालभाषा ब्वंकीपिं स्यनामि, ग्वसाः खलः व निर्णायकमण्डलया दथुइ छगू सहलह मुँज्या जुल ।

अभियानया संयोजकनापं मोडर्न नेवाः इंग्लिश स्कुलया निर्देशक दीपक तुलाधरया सभापतित्वय् न्ह्याःगु सहलह मुँज्याय् मचा सिरपाः कमिटीया दुजः नापं जगतसुन्दर ब्वनेकुथिया सुनिता मानन्धरं लसकुस यानादिसें कासाय् नेवाः भासं आखः ब्वंका वयाच्वंगु बाहेकंया स्कुलया मस्तय्त नं कासाय् सहभागि याकेमाःगु खँय् थःगु विचाः तयादिल ।

ज्याझ्वलय् थगुने कासाय् ब्वति काःगु ब्वनेकुथिया जानकारी बियादिसें काठमाडौं नेवाः किन्डरगार्टेनया निर्देशक नापं सिरपाः कमिटीया दुजः राजेन्द्र महर्जनं मचा सिरपाः लःल्हानाकाःम्ह मचा दबुलिं कुहां वयेवं उम्ह मचां थः अभिभावक, पासापिं वा मेपिं सुलिसे नं खय् भासं खँ ल्हात धाःसा व थें विडम्बना व दुःखया खँ मेगु छु जुइ धइगु न्ह्यसः तयादिल ।

ज्याझ्वलय् नेपालभाषा स्यनामिपिं सोनी श्रेष्ठ, कायबहादुर नेपाली, ल्यज्या पुचःया दुजः जियम श्रेष्ठं नं नुगः खँ प्वंकादीगु खःसा थीथी ब्वनेकुथिया स्यनामिपिंसं कासायात व्यापक याना यंकेगु निंतिं थःथःगु सुझाव बियादीगु खः । मचा सिरपाःया निंतिं उत्कृष्ट मस्त ल्ययेगु ज्या थ्व हे वइगु शनिवाः जुइत्यंगु दुसा वइगु कात्तिक २ गते सिरपाः लःल्हायेगु अभियानं जानकारी बिउगु दु ।