डब्लुएनओया तःमुँज्याया निंतिं सहलह मुँज्या

येँ – वल्र्ड नेवाः अर्गनाइजेसन (डब्लुएनओ)या स्वक्वःगु तःमुँज्या व निक्वःगु विश्व नेवाः दिवस ताः लाकेया निंतिं वंगु शनिवाः थीथी खलः, पुचःया प्रतिनिधिनाप सहलह ज्याझ्वः जुल । डब्लुएनओ नेपाः कवःया ग्वसालय् जूगु थुकथंया थ्व स्वक्वःगु सहलह मुँज्या खः ।

वइगु मार्च २८ निसें ३० तक स्वन्हुयंकं जू वनाच्वंगु डब्लुएनओ स्वक्वःगु तःमुँज्या ताःलाकेया निंतिं जूगु सहलह मुँज्याय् नेवाः न्ह्यलुवा लक्ष्मीदास मानन्धर, मल्ल के. सुन्दर, हितकरवीर सिंह कसाः, प्रा. प्रेमशान्ति तुलाधर, डा. महेशमान श्रेष्ठं थीथीकथंया सल्लाह व सुझाव बियादीगु खः ।

सहलह मुँज्याय् थीथी खलः, पुचःपाखें प्रतिनिधित्व यानाः झायादीपिं नेवाः ख्यःया विशिष्ट व्यक्तित्वपिं, राजनीतिक दलया प्रतिनिधि, नेवाः बुद्धिजीवि लगायत आपालं संचारकःमिपिनिगु नं उपस्थिति दुगु खः ।

सहलहया झ्वलय् राज्यं नेवाःतय्त शिक्षा, स्वास्थ्य, आर्थिक लगायत आपालं ख्यलय् लिउने लाका यंकेगु ज्या यानाच्वंगु व थुकिं नेवाःतय् अस्तित्व हे न्हना वनीगु खतरा दुगु धासें नेवाःतय्गु संरक्षणया निंतिं डब्लुएनओ नेपालय् जुइगु सम्मेलनं नेपालभाषा व नेवाः जातियात ल्यंका तयेगु निंतिं विश्वन्यंकंया नेवाःतय्त छप्पँ छधी याना यंकेगु खँय् ध्यान बीमाःगु सहभागिपिंसं धाःगु दु । ज्याझ्वः डब्लुएनओ नेपाः कवःया नायः शाक्य सुरेनया सभापतित्वय् जूगु खः ।