समाजवादी नेवाः संघया विस्तारित बैठक
येँ (नेपालभाषा टाइम्स)- नेपाल समाजवादी पार्टीया अध्यक्ष लिसें कृषि मन्त्री महेन्द्रराय यादवं संघीयता व गणतन्त्रया रक्षा एमालें याये फइ मखु धयादीगु दु । नेपाल समाजवादी नेवाः संघया विस्तारित बैठक व पार्टी प्रवेश ज्याझ्वलय् नवासें मन्त्री यादवं उगु खँ धयादीगु खः । नेकपा (एमाले) अध्यक्ष केपी शर्मा ओलीं वंगु छं दिं न्ह्यः जक तत्कालीन इलय् संसद विघटन यायेमाःगु कारण पार्टी ध्वस्त यायेत्यंगुलिं खः धकाः अभिव्यक्ति बियादीगु खः ।
ओलीया उगु अभिव्यक्तियात कयाः मन्त्री यादवं धयादी, ‘एमाले अध्यक्ष ओलीया चिन्ता संघीयता, गणतन्त्र व संविधानया रक्षा मखु, पार्टीया रक्षा जक खः, अथे जुयाः एमालें संघीयता व गणतन्त्रयात रक्षा यायेगु खँ ल्हाइ मखु ।’ वय्कलं नेपाःया राजनीतिक इतिहासय् नेवाःतय्गु तःधंगु योगदान दु धासें राजनीतिक रुपं नेवाःत न्ह्यःने वयेमाःगु आवश्यक दुगु खँ नं धयादीगु दु ।
पार्टीया मेम्ह अध्यक्ष डा. बाबुराम भट्टराईं नेपाःया समृद्ध जाति नेवाःत राज्य सत्ताय् मदुगुलिं हे थौं नेवाःत झन जक लिउने लानाच्वंगु खँ धयादीगु दु । वय्कलं अधिकार कायेगु खःसा नेवाःत थःहे न्ह्यचिलेमाः धकाः थम्हं ताः इलंनिसें धयाच्वनागु खःसां नेवाःत आन्दोलनय् कुहां मवयाच्वंगु दुःखया खँ खः धयादिल ।
नेपाल समाजवादी नेवाः संघया अध्यक्ष माधव श्रेष्ठया सभापतित्वय् जूगु ज्याझ्वलय् बागमति प्रदेशया कानुन मन्त्री गंगानारायण श्रेष्ठ, पार्टीया केन्द्रीय दुजः मानुषि यमि भट्टराईं नं संबोधन यानादीगु ज्याझ्वलय् नेवाः संघया संरक्षकलिसे पार्टीया जनजाति संघठनया अध्यक्ष अनुपसिंह सुवालं अवधारणा पौ न्ह्यब्वयादीगु खः ।
संघया महासचिव दिलिप शाही लसकुस यासें न्ह्याःगु ज्याझ्वलय् सछि स्वयां अप्वः व्यक्तित पार्टीइ दुहां वःगु खः ।
LEAVE YOUR COMMENTS