स्कुल स्कुलय् लाखे व पुलुकिसि
येँ (नेपालभाषा टाइम्स)÷यँयाः जात्रा थौं क्वचायेत्यंगु दु । थौं नानिचा याः जुइसा बहनी यःसिं क्वःथली । थौं हे राष्ट्रपतिपाखें कुमारीया ल्हातं सिन्हः तिनादी ।
थुगुसी येँया थीथी विद्यालयय् नं यँयाः न्यायेकेगु ज्या जुल । येँ मनपां स्थानीय विषय नेपालभाषां ब्वंकेगु शुरु यायेवं उकिया हे पाठ्यक्रम कथं विद्यार्थीतय्त यँयाः पर्व न्यायेके बीगु ज्या जूगु खः ।
थ्व लसताय् थनया जगतसुन्दर ब्वनेकुथि, काठमाडौं किन्डरगार्टेन, जनपथ मावि, ह्वाइटफिल्ड स्कुल, विश्व निकेतन मावि आदि स्कुलय् लाखे, पुलुकिसि पित हयाः यँयाः न्यायेकेगु ज्या जूगु खः । गनं गनं स्कुलय् ला पुलुकिसि पित हयाः स्कुलया जःखः च्वंगु सतकय् तकं चाःहीकेगु ज्या जूगु खः । अथे हे ज्याझ्वः लिपा मस्तय्त समय्बजि नकेगु ज्या याःगु खः । थुकिं मस्तय्त पाठ्यक्रम कथं येँया संस्कृतिबारे थुइकेत यक्व अःपुइगु खँ सम्बन्ध स्यनामितय्सं धाःगु दु ।
थ्वहे झ्वलय् म्हिगःनिसें अमेरिकाय् नं थीथी थासय् यँयाः पर्व न्यायेकेगु ज्या जूगु दु । हलिं नेवाः दबूया पुलांम्ह नायः सिजन श्रेष्ठं कनादी कथं थुगुसी जक अमेरिकाया ११ गू थासय् यँयाः पर्व न्यायेकेगु ज्या जुयाच्वंगु दु ।
LEAVE YOUR COMMENTS