ने. सं. ११४४ कौलाथ्व पारू - नःलास्वनेगु

गुथि संस्थानय् असम्बन्धित मनू प्रमुख नियुक्त

येँ (नेपालभाषा टाइम्स)- स्थानीय संस्कृति सम्पदाया संरक्षण यानाः पहिचान बचे यायेमाः धकाः नारा बीम्ह सरकारं संस्कृति सम्पदालिसे स्वापू दुगु गुथि संस्थानय् धाःसा थ्व विषयलिसे छुं हे सम्बन्ध मदुम्ह मनूयात प्रमुख दयेकूगु दु । अन प्रमुख प्रशासक कायम जुयाच्वंम्ह स्वनिगःया स्थानीयवासी किरण शाक्ययात पदावधि ल्यं दनिबलय् हे पदमुक्त यानाः शैलेशराज कुँवरयात नियुक्त याःगु दु । कुँवर संस्कृति सम्पदा लिसे छुं स्वापू मदुम्ह ठेकेदारी ज्या याइम्ह खः । सूत्रतय्सं धाःकथं कुँवरयात उगु पदय् नियुक्त यायेगु लागिं हे सरकारं किरण शाक्ययात अनावश्यक द्वपं बियाः पदं चीकेगु ज्या याःगु खः ।

विज्ञ सूत्रं धाःकथं महोत्तरीस्थित समरदहीया महन्त नियुक्त यायेगु खँयात कयाः शाक्य व सरकार दथुइ मतभेद ब्वलंगु खः । भूमिसुधार मन्त्री रञ्जिता श्रेष्ठं चौधरीं थ्व खँयात त्वहः दयेकाः शाक्ययात थीथी द्वपं बिसें स्पष्टीकरण कायेगु ज्या याःगु खः । तर शाक्यं बिउगु स्पष्टीकरण चित्त बुझे मजू धासें वंगु मोहनि न्ह्यः हे वय्कःयात पदमुक्त यानाः तुरुन्त हे कुँवरयात नियुक्त याःगु खः ।

लुमंकेबहः जू, गुथि संस्थानय् शाक्य वये न्ह्यः ताः ई तक हे प्रमुख प्रशासक पद प्वनाच्वंगु खः । तत्कालीन प्रधानमन्त्री केपी ओलीं गुथि संस्थानय् स्वनिगःया स्थानीय नेवाःयात हे प्रमुख दयेकेमाः धकाः शाक्ययात अन नियुक्त याःगु खः । शाक्यया पालय् नेवाः जात्रापात्रायात गुथिपाखें बीमाःगु ग्वाहालि सम्बन्धी समस्या ज्यंकेगु ज्या जूगु खः ।