तामाङ शोधार्थीं नेवाः भासं पीएचडी याइगु

येँ – नेपालभाषा केन्द्रीय विभागपाखें थुगुसी पीएचडी यानादीपिं शोधार्थीत मध्ये छम्ह तामाङ भाषी प्रशिक्षार्थी नं लाःगु दु । तामाङ भाषाया नांजाःम्ह च्वमि लिसें अनुसन्धाता भाजु अजितमान तामाङं नं नेपालभाषां पीचएडी यायेगु लागिं तयारी यानादीगु दु । थुगुसी पीएचडीया लागिं आवेदन बिउपिं १२ म्ह शोधार्थी मध्ये खुम्ह जक लिखित परीक्षाय् पास जूगु खः । पास जूपिं मध्ये छम्ह भाजु तामाङ नं खः । वय्कलं दक्षिण एशियाया थीथी लिपि बारे शोध यायेगु कथं आवेदन बियादीगु दु । लिखित परीक्षाय् पास जूपिं शोधार्थीतय्गु मौखिक अन्तर्वार्ता मेगु वालय् जुइ । उकी नं उत्तीर्ण जुल कि वय्कःपिं पीएचडी शोधया लागिं योग्य ठहर जुइ ।

तामाङ लगायत थुगुसी पीएचडीया लागिं अनुप सिं सुवाल, नरेशवीर शाक्य, पूर्णिमा डंगोल, राजितबहादुर श्रेष्ठ व रवि शाक्य नं लिखित परीक्षाय् उत्तीर्ण जूगु खः । शोधया लागिं मुक्कं १२ म्ह शोधार्थीतय्सं परीक्षा बिउगु खः । थ्वहे झ्वलय् नेपालभाषा केन्द्रीय विभागय् एमए तगिंया लागिं भर्ना चाःगु खँ विभागं धाःगु दु । न्ह्यागु हे विषयय् नं स्नातक (बीए) सिधःपिं विद्यार्थीतय्सं नेपालभाषा कयाः एमए कक्षाय् भर्ना जुइ दइ । इच्छुकपिंसं माघ ४ गते तकया दुने क्याम्पसय् स्वापू तये फइगु खँ नं विभागं धाःगु दु ।