रेशम चौधरीयात त्वःतेगु प्रम दाहालया बचं
येँ (नेपालभाषा टाइम्स)÷प्रधान– मन्त्री पुष्पकमल दाहालं कानुनसम्मत ढंगं रेशम चौधरीयात त्वःतेगु खँ धयादीगु दु । प्रतिनिधिसभाय् विश्वासया मत कायेगु झ्वलय् वय्कलं उगु खँ धयादीगु खः ।
तराई मधेशया थीथी राजनीतिक दलतलिसे थीथी इलय् जूगु समझदारीया आधारय् अध्यादेश दयेकाः जूसां चौधरी सहितया नेता कार्यकर्तातय्त त्वःतेगु कुतः यायेगु खँ धासें वय्कलं संसदया अधिवेशन न्ह्यायेधुंकूगुलिं आः कानुन दयेकाः त्वःतेगु खँ धयादिल ।
चौधरीयात त्वःतेगु विषययात कयाः सत्ता गठबन्धन दलया संयन्त्रय् नं सहलह यायेधुनागु खँ कँसें प्रम दाहालं संयन्त्रया बैठकय् नं फयांफछि याकनं पहल यायेत सहमति जूगु खँ कनादिल ।
चौधरीया मुद्दा अदालतय् थ्यनेधुंकूगुलिं छुं जटिल जूगु खँ धासें वय्कलं धयादिल, ‘ऐनया समुचित व्यवस्था यानाः अन्यायपूर्ण रुपय् बन्दी दयेका तःपिंत त्वःतेगु पहल यायेगु जुइ ।’ थम्हं सार्वजनिक ज्याझ्वलय् चौधरीयात अन्याय जूगु व न्याय बीमाः धकाः धया वयाच्वनागु खँ नं वय्कलं धयादिल ।
सदनय् नागरिक उन्मुक्ति पार्टीया अध्यक्ष रञ्जिता श्रेष्ठं प्रम दाहालयात विश्वासया मत बीगु तर चौधरी सहित थारु बन्दीत मत्वःतूतले सरकारय् धाःसा ब्वति मकायेगु खँ धयादीगु खः ।
अध्यक्ष श्रेष्ठं प्रमं बिउगु मौखिक बचं पूवंगु खःसा थःपिं सत्तापक्षया हे कुर्सीइ च्वनेगु जुइ धासें धयादिल, ‘गबले तक जिमिगु माग पूवनी मखु, अबले तक प्रतिपक्षया हे कुर्सीइ च्वनेगु जुइ ।’
उकथं हे नेकपा (एस) या अध्यक्ष माधव नेपालं नं थारु नेता चौधरीयात त्वःतेमाःगु माग यानादीगु दु । अध्यक्ष नेपालं धयादिल, ‘टिकापुर घटनाया सन्दर्भय् रेशम चौधरीयात त्वःतेगु खँय् सरकारं उच्चतम प्राथमिकता बियाः पहल यायेमाः ।’
LEAVE YOUR COMMENTS