महाकवि सिद्धिदासया बुन्हि हन
येँ (नेपालभाषा टाइम्स)÷ महाकवि सिद्धिदास अमात्यया १५६ क्वःगु बुन्हि थौं थीथी ज्याझ्वः यासें हनाच्वंगु दु । थ्व हे झ्वलय् आइतवाः सुथय् नसँचा उलेगु, सिद्धिदास सिरपाः लःल्हायेगु ज्या जूगु दु ।
थौं सुथय् येँया रत्नपार्कस्थिति शान्तिबाटिकाय् च्वंगु सिद्धिदासया झ्वाताय् स्वांमाः क्वखायेकुसें नसँचा उलेगु ज्या जूगु खः । महाकवि सिद्धिदासया तस्बिरयात बग्गीलय् तयाः सैनिक बाजं, परम्परागत दाफा बाजंसहित कुमारी रथजात्रा जुइगु रुटय् चाःहिउगु खः । ज्याझ्वलय् भाषासेवीपिं लगायत थीथी स्कूलया विद्यार्थीपिनि सहभागिता दुगु खः ।
नसँचा उलेज्या क्वचायेवं जनबहालय् च्वंगु दबुलिइ छगू ज्याझ्वःया दथुइ सिद्धिदास सिरपाः लःल्हाःगु खः । थुगुसी वरिष्ठ साहित्यकार फणीन्द्ररत्न बज्राचार्ययात सिद्धिदास सिरपाःपाखें हंगु खः । अथेहे अन्वेषक काशीनाथ तमोटयात सिद्धिदास विद्वत्वृत्रि लःल्हाःगु खः ।
सिद्धिदास बुन्हिया लसताय् स्कूलया विद्यार्थीपिनि दथुइ जूगु सिद्धिदास सम्बन्धी च्वसु च्वयेगु धेंधेंबल्लाखय् त्याःपिंत नं ज्याझ्वलय् पुरस्कृत याःगु खः । ज्याझ्वलय् मूपाहाँ जनकवि दुर्गालाल श्रेष्ठं सिरपाः लःल्हानादीगु खः ।
सिद्धिदास सिरपाःया नितिं समाजसेवी व गायक योगेश्वर अमात्यं आर्थिक ग्वाहालि यानादीगु खः । ज्याझ्वः नेपालभाषा मंकाः खलः, सिद्धिदास स्मृति समाज, सिद्धिदास सिरपाः पुचः व मछिन्द्र क्लबया ग्वसालय् जूगु खः ।
LEAVE YOUR COMMENTS