नेवाः पुचः युएईया क्षेत्रीय समिति गठन

येँ – संयुक्त अरब इमिरेट्सय् च्वनाच्वंपिं नेवाःतय् संगठन नेवाः पुचः युएईया अबुधाबी क्षेत्रीय समिति गठन याःगु दु । वंगु घ्यःचाकु संल्हुकुन्हु अबुधाबीया हेरिटेज पार्कय् जूगु छगू गुँभ्वय्या दथुइ क्षेत्रीय समिति गठन याःगु खः । नेवाः पुचः युएईया केन्द्रीय समितिया पदाधिकारीतय् उपस्थितिइ जूगु मुँज्यां क्षेत्रीय समिति विस्तार संयोजक राजेश प्रधानं क्षेत्रीय समितियात आधिकारिक मान्यता बियादीगु खः । न्हू गठन जूगु समितिया संयोजक सुनिलमान श्रेष्ठया सभापतित्वय् जूगु ज्याझ्वः नेपाःया राष्ट्रिय म्येँ हायेकाः न्ह्याकूगु खःसा केन्द्रीय दुजः हिरालाल श्रेष्ठं लसकुस यानादीगु खः ।

केन्द्रीय मूछ्याञ्जे कुमार बलामिं नेवाः पुचः युएईया ज्याझ्वः, भावी योजना व क्षेत्रीय समितिया औचित्ययात कयाः थःगु नुगःखँ तयादीगु ज्याझ्वलय् केन्द्रीय उपाध्यक्षलिसें क्षेत्रीय समिति विस्तार संयोजक प्रधानं समितियात आधिकारिकता बियादिसें न्हूगु क्षेत्रीय समितिया कार्यकाल सफलताया निंतिं भिंतुना बियादीगु खः । सुनिलमान श्रेष्ठया संयोजकत्वय् गठन जूगु क्षेत्रीय समितिइ मनोजकुमार सैंजू उपसंयोजक, राजेश श्रेष्ठ सचिव, पुष्कर प्रधान उपसचिव, अनिता श्रेष्ठ कोषाध्यक्ष जुयादीगु दु ।

अथे हे समितिया दुजलय् राजेश श्रेष्ठ, बालकृष्ण कायस्थ, जनक श्रेष्ठ व रुद्र प्रधान च्वनादीगु दुसा सल्लाहकारय् प्रज्वल श्रेष्ठ, भिमनारायण श्रेष्ठ, भुवन नकःमि, रविन्द्र महर्जन व हिमालयश्वरी श्रेष्ठ च्वनादीगु दु । उगु गुँभ्वय् न्हू गठन जूगु क्षेत्रीय समिति व अबुधाबी मिसा पुचःया मंकाः ग्वसालय् जूगु खः ।

सम्बन्धित बुखँ

LEAVE YOUR COMMENTS