गुथि अस्ट्रेलियां यँयाः हनीगु

येँ(नेपालभाषा टाइम्स)- अस्ट्रेलियाय् नं यँयाः नखः तःजिक हनीगु जूगु दु । गुथि साउथ अस्ट्रेलियाया ग्वसालय् थुगुसी नं यँयाः नखः हनेत्यंगु खः । गुथि साउथ अस्ट्रेलियां खुक्वःखुसी यँयाः नखः हनेत्यंगु खः ।

कन्हय् अक्टोबर १ तारिख आइतवाःकुन्हु क्रसग्रोव हल क्लोभेल्ली पार्कय् यँयाः नखः हनेत्यंगु खः । गुथि साउथ अस्ट्रेलियाया लिउछ्याञ्जे सजिन प्रधानांगयाकथं यँयाः जात्राय् मुख्य आकर्षणकथं कुमारि जात्रालिसें धिमे बाजं, लाखे प्याखं, पुलुकिसिया आकर्षणत दइ । विशेष यानाः यँयाः समय्बजिया नखः जूगुलिं समय्बजिया ब्वज्या नं जुइगु जानकारी वय्कलं बियादीगु दु ।

थ्व बाहेकं वज्रयान धर्मय् आधारित नेपालमण्डलया प्राचीन शास्त्रीय प्याखं कथं कयातःगु चचाप्याखं कुमारि, वज्रयोगिनी, मंजुश्री, पंचबुद्धया प्याखं नं जात्राया झ्वलय् न्ह्यब्वइगु जूगु दु ।

नेपाःया प्राचीन सभ्यतालिसें नेवाः समुदायया सम्पदा, कला, संस्कृतियात विश्वय् म्हसीका बीगु नापं न्हू पुस्तायात नं जानकारी बीगु ल्याखं नेपाःया हे बिस्कं म्हसीका व सांस्कृतिक महत्वं जाःगु यँयाः नखः हना वयाच्वनागु संस्थां जानकारी बिउगु दु ।

सन् २०१५ य् नीस्वंगु गुथि साउथ अस्ट्रेलियां नेवाः कला, संस्कृतिया संरक्षण, संवद्र्धन व प्रवद्र्धन यायेगु ल्याखं थीथी नखःचखःया लसताय् थुकथंया थीथी गतिविधि याना वयाच्वंगु दु ।