छिगुपाखें छेँय् च्वंपिंत नं संक्रमण जुइफु – मेयर शाक्य

येँ – येँ महानगरपालिकाया मेयर विद्यासुन्दर शाक्यं पीसीआर टेस्टया रिपोर्ट नेगेटिभ वल धायेवं थःत छुं हे मजू धकाः लापर्वाह मयायेत नगरवासीयात इनाप यानादीगु दु । थःत छुं मजू धकाः पिहां पिहां जुइपिं मनूतय् मार्फत छेँय् च्वंपिं मांअबु लगायत गबलें हे छेँनं पिहां मवःपिं मनूत संक्रमित जुयाच्वंगु कारणं सुं नं पिहां मवयेत नं वय्कलं इनाप यानादीगु दु ।

छुं जुयाः सुं संक्रमित जुल धाःसा वयात दुव्र्यवहार मयायेत इनाप यासें छेँय् च्वनेत सुयातं समस्या जूसा सतिक च्वंगु आइसोलेसशनय् च्वनेत नं वय्कलं आह्वान यानादीगु दु ।

थ्व इलय् आपतय् लानाच्वंपिंत निःशुल्क राहत बी धकाः वयाच्वंपिंसं सकसितं क्यनाः हल्लाखल्ला यानाः ग्वाहालि मयासे धाथें मानवीय सेवाया भावनां ग्वाहालि काइम्हेसिया नं आत्मसम्मान जुइ कथं ज्या यायेगु खःसा अज्याःगु पुचःयात थःपिंसं नं ग्वाहालि यायेगु खँ नं वय्कलं कनादिल ।