‘जिरो प्वाइन्ट खोनाय् हे तयेमाः’

फास्ट ट्र्याकया लँ खोनां यंकेमाःगु स्थानीयतय् माग

येँ – खोनाया स्थानीय वासिन्दां फास्ट ट्राय्कया जिरो प्वाइन्ट खोनाय् हे तयेमाःगु माग याःगु दु । बुंगया फर्सिडोलय् जिरो प्वाइन्ट तल धाःसा खोनाया विकासय् लिच्वः लाइ धासें स्थानीय जनतां जिरो प्वाइन्ट खोनाय् हे तयेमाःगु माग याःगु खः ।

स्थानीय शरणगोपाल महर्जनं ‘नेपालभाषा टाइम्स’ लिसें खँ ल्हासें स्थानीय जनताया दथुइ खोनाय् हे जिरो प्वाइन्ट तयेमाः धकाः सहलह जुयाच्वंगु जानकारी बियादिसें धयादिल, ‘स्थानीय बुद्धिजीवी व स्थानीयवासी दथुइ व्यापक सहलह जुयाच्वंगु दु ।’

बछि धइथें स्थानीय जनतां मुआब्जा कयातये धुंकूगु व अधिग्रहण यायेधुंकूगु जग्गा लिफ्यानाः कायेत तसकं थाकुइगु जुइगुलिं नं जिरो प्वाइन्ट खोनाय् हे तयेमाःगु तर्क वय्कलं तयादिल। ।वयकलं धयादी, ‘अधिग्रहण यायेधुंकूगु जग्गा लित काये फइ हे मखु धाःसां जिउ । न्हापा न्हापा नं थथे अधिग्रहण यानातःगु जग्गा लित कायेगु कुतः जूगु खः ।

तर आः तक लित कायेफुगु मदु । उकिं आः खोनाय् लँ मवल धाःसा अधिग्रहण यायेधुंकूगु जग्गा नं लित काये फइ मखु । उकिं जग्गाया उचित मुआब्जा कयाः लँ दयेके बीगु हे उचित जुइ ।’लिसें वय्कलं फास्ट ट्राय्कं पीडित स्थानीय जनतायात रोजगारीया व्यवस्था यायेमाःगु, फास्ट ट्राय्कपाखें वइगु लबःया छुं ब्व स्थानीय विकासया निंतिं फ्यायेमाःगु माग नं यानादीगु दु ।

वय्कलं धयादी, ‘स्थानीय थाय्या विकासया निंतिं म्होति नं ०.२५ प्रतिशत ध्यबा स्थानीय लागाया विकासया निंतिं फ्यायेमाः ।’ अथेहे वय्कलं बछिं मल्याक जग्गा मेपिंत मीधुंकूगु खँ न्ह्यथनादिसें भुखाचं आपालं स्थानीय जनताया छेँ दुनावंगु तर उकिया लालपूर्जा मदुगुलिं यानाः सरकारपाखें वइगु छुं नं कथंया सुविधा काये मफयाच्वंगु खँ नं कनादिल ।

अथे जुयाः आः मुआब्जा कयाः छेँ दनेगु कि मेगु जग्गा मियाः छेँ दनेगु धयागु न्ह्यसः वयाच्वंगु खँ नं वय्कलं कनादिल ।
अथे हे मेम्ह स्थानीय वासिन्दा हरिगोविन्द महर्जनं नं खोनाय् जिरो प्वाइन्ट तये मजिउ धकाः विरोध यायेगु औचित्य मदुगु खँ कनादिसें विरोधया निंतिं विरोध जुयाच्वंगु दावी यानादिल ।

वय्कलं नं नं खोनाय् हे जिरो प्वाइन्ट तयेमाःगु बिचाः प्वंकादिल । जिरो प्वाइन्ट खोनाय् तल धायेवं अनया परम्परागत थासय् गुगुं नं कथंया लिच्वः मलाइगु दावी नं वय्कःया दु । आः गुलि नं स्थानीय मुआब्जा अप्वयेकेमाः धकाः हालाच्वंगु दु, उपिं सकसिनं न्हापा हे मुआब्जा कयातयेधुंकूगु खँ कनादिसें हरिगोविन्द महर्जनं धयादिल, ‘मुआब्जा कायेगु धयागु फास्ट ट्राय्कया विरोध याःगु मखुसें समर्थन याःगु खः ।’

न्हापा क्वछिनातःगु मुआब्जा यक्वः म्हो जूगुलिं आः प्रचलित भाः कथं मुआब्जा बीमाःगु माग नं वय्कलं यानादीगु दु । न्हापा मुआब्जा बिउबलय् प्रति आना १ लाख ६५ हजार तका निर्धारण यानातःगु खः । तर आः उगु लागाय् प्रति आना ७ निसें ८ लाख तकां जग्गा कारोबार जुयाच्वंगुलिं मुआब्जा नं वहे कथं निर्धारण यायेमाःगु माग नं वय्कःपिनि दु ।

९० प्रतिशत स्वयां अप्वः जनता फास्ट ट्राय्कया पक्षय् दुगु धासें वय्कलं विकास महयेगु धइगु थःपिं हे लिउने लाइगु जूगुलिं फास्ट ट्राय्क खोनां मेथाय् यंके मजिउ धयादिल । थःपिनिगु जग्गा आयोजनाय् लाःगुलिं गुलिखे स्थानीययात रोजिरोटीया समस्या जुइफु, उकिं उमिगु निंतिं विशेष व्यवस्था यायेमाःगु माग वय्कःपिनि दु ।

‘बरु फास्ट ट्रायकपाखें स्थानीय जनतायात रोजगारी ग्यारेन्टी दयेमाः, स्थानीय लागाय् स्थानीय जनतायात रोजगारया ग्यारेन्टी सरकारं यायेमाः’ हरिगोविन्दं धयादिल ।