ने. सं. ११४६ दिल्लाथ्व पारू -

साह व लामिछाने संसदय् नापं छाय् ?

निम्हेसिया दथुइ स्वापू स्यनावंगु मदु धयागु सन्देश बीगु कुतः जूगु दावी

येँ (नेपालभाषा टाइम्स) – प्रधानमन्त्री बालेन साह व राष्ट्रिय स्वतन्त्र पार्टीया सभापति रवि लामिछाने नापं म्हिगः संसद भवनय् थ्यंगु खँयात अर्थपूर्ण रुपय् काःगु दु ।

म्हिगः प्रधानमन्त्री साह व लामिछाने निम्हं नापं संसदय् उपस्थित जूगु खः । तर प्रधानमन्त्री साह २० मिनेट जक संसदया बैठकय् च्वनाः लिहां झाःगु खः ।

प्रधानमन्त्री जुइधुंकाः साहया संसदय् थ्यंगु थ्व निक्वःगुखुसी खः । लत्या न्ह्यः जेठ १७ गते न्हापांखुसी संसदय् उपस्थित जुयाः नेपालं नं भारतया भूभाग त्यला तःगु धकाः विबादस्पद खँ न्ववाना वनेधुंकाः साह म्हिगः न्हापांखुसी संसद थ्यंगु खः ।

संसदय् न्हापांखुसी न्ववाःगु झ्वलय् बिउगु विवादास्पद धापूयात कयाः सांसदतय्सं प्रधानमन्त्रीं माफी फ्वनेमाःगु माग याना वयाच्वंगु दु । थ्व झ्वलय् विपक्षीतय्सं आपत्ति प्वंकेगुया लिसें सदन अवरुद्ध तकं याना वयाच्वंगु खः । अथे खःसां म्हिगः संसदय् थ्यंम्ह प्रधानमन्त्री छुं न्ववमवासे लिहां वंगु खः ।

सभापति लामिछाने व प्रधानमन्त्री साह नापं सदनय् वःगु कारण धाःसा निम्ह नेतातय् दथुइ आः नं सौर्हादपूर्ण स्वापू दु धयागु क्यनेत जूगु अनुमान जुयाच्वंगु दु । थौंकन्हय् संचारमाध्यमय् निम्ह नेतातय् दथुइ तसल जुयाच्वंगु धयागु खँ यक्व पिहां वयाच्वंगु दु । उकियात गलत सावित यायेत निम्ह नेता नापं संसदय् वःगु खँ सूत्रं धाःगु दु ।

प्रधानमन्त्री बालेन साह छुं न्हि न्ह्यः जक लामिछानेया बुढानिलकण्ठय् च्वंगु छेँय् वनाः खँल्हाबल्हा याःगु खः । उगु इलय् निम्हेसिया दथुइ प्रधानमत्री व मन्त्रीतय् ज्यायात कयाः लामिछानें असन्तुष्टि प्वंकूगु खँ चर्चा जुयाच्वंगु दु ।

प्यघौ तक जूगु उगु वार्ताय् प्रधानमन्त्री साह लिसें वय्कःया प्रमुख राजनीतिक सल्लाहकार कुमार बेन नं उपस्थित दुगु खः । बेन नं नापं दुगु वार्ताय् लामिछानें प्रधानमन्त्रीया सचिवालयं यानाच्वंगु ज्यायात कयाः नं असन्तुष्टि प्वंकूगु खःसा प्रधानमन्त्री सल्लाहकारत तकं हिलेमाःगु सुझाव बिउगु चर्चा दु ।

सभापति लामिछानें उबलय् बेनसहित दुगु सचिवालयया कारणं सरकार अप्वः विवाद वयाच्वंगु व बेनयात चीकाः पार्टीया पाखें हे सचिवालय नीस्वनेमाःगु प्रस्ताव तःगु खः ।

उबलय् प्रधानमन्त्री साहं बेनयात राजनीतिक सल्लाहकारं चीकेगु खःसा अर्थमन्त्री स्वर्णिम वाग्लेयात नं चीकेमाःगु प्रस्ताव तःगु जुयाच्वन । उबलय् प्रधानमन्त्री साहं अर्थमन्त्रीया कारणं नं सरकार विवादय् लानाच्वंगु धासें चीकेमाःगु प्रस्ताव तःगु खः ।

थ्व वार्ताय् प्रधानमन्त्री साह बेनयात चीकेत व सभापति लामिछाने अर्थमन्त्रीयात चीकेत तयार मजूगु खः । उबलय् सभापति लामिछानें अर्थमन्त्री वाग्लेयात चीकेगु कुतः जुल धाःसा पार्टी व सरकारया बारे जनताय् बांमलाःगु सन्देश वनीगु जुयाः तत्काल चीकेमजिउगु खँ धाःगु खः ।

प्रधानमन्त्री साह व सभापति लामिछाने दथुइ जूगु वार्ताय् अप्वः असन्तुष्टित प्वंकेगु ज्या जूगुलिं निम्हेसिया दथुइया स्वापू स्यना वंगु चर्चा जुयाच्वंगु खः । थथे मखु धयागु सन्देश बीत हे निम्हं नापं संसदय् वंगु सभापतिया सचिवालय सूत्रं धाःगु दु ।

म्हिगः संसद भवन पिहां वयेगु झ्वलय् सञ्चारकर्मीतय्त प्रतिक्रिया बीगु झ्वलय् लामिछानें स्वन्हु न्ह्यः प्रधानमन्त्री साहलिसे जूगु वार्ता सका–रात्मक जूगु प्रतिक्रिया बियावंगु खः ।