एमालेया निगुलिं गुट आः ‘कूल’

येँ – सर्वोच्च अदालतलिसे यानातःगु ‘सेटिङ’ धमाधम स्यना वनेवं आः प्रधानमन्त्री केपी शर्मा ओलीं न्हापा स्वयां नरम नीति ज्वनेगु शुरु याना हःगु अनुमान याना हःगु दु । थ्व झ्वलय् वय्कःया गुट दुने आः नेपाल–खनाल पुचःयात न्हापा थें आक्रमण मयायेगु बिचाः न्ह्यःने वःगु दुसा उकिया नापनापं नेपाल–खनाल पुचः दुने नं न्हापा थेंज्याःगु कटु बिचाः मतयेगु कथंया ज्या न्ह्याना वःगु अनुमान याःवःगु दु ।

विशिष्ट सूत्रतय्सं धाः कथं ओली व नेपाल–खनाल निगुलिं गुट दुने च्वंपिं छुं छुच्चा स्वभावयापिं मनूतय्गु कारणं वातावरण निर्माण जुइ मफयाच्वंगु खँयात निगुलिं पुचःया वरिष्ट नेतातय्सं वाःचायेका हःगु दु । ओली पुचः दुने खास यानाः वय्कःया सल्लाहकार जुयाच्वंपिं छुं मनूतय्सं छुद्र वचन न्ववायेगु यानाच्वंगु कारणं नेपाल–खनाल पुचःयात उत्तेजित यानाच्वंगु विश्लेषण यानाहःगु दु । थुकी खास यानाः वय्कःया राजनीतिक सल्लाहकार बिष्णु रिमाल, परराष्ट्र सल्लाहकार राजन भट्टराई व प्रेस सल्लाहकार सूर्य थापापिनिगु छुद्र वचन अप्वः जिम्मेवार जुयाच्वंगु नं विश्लेषण यानाहःगु दु । थुकियात वाःचायेकाः आः राजनीतिक सल्लाहकार बिष्णु रिमालया छुद्र टिप्पणीयात पूर्ण रुपं नियन्त्रणय् तयेधुंकूगु दु । थौंकन्हय् रिमालं न्हापा थें सामाजिक सञ्जालय् नेपाल–खनाल पुचःयात ब्वः बियाः च्वयेगु–न्ववायेगु याना महयेधुंकूगु दु ।

उखे नेपाल–खनाल गुट दुने नं भीम रावलया कडा वचनं यानाः संवादया वातावरण निर्माण मजुयाच्वंगु अनुमान यानाहःगु दु । सूत्रतय्सं धाःकथं रावलं थौंकन्हय् नेपाल–खनाल पुचःया सुं नेतां ओली पुचःलिसे स्वापू जक तल धाःसां नं उमित लाक्वथाक्व ब्वः बीगु यानाच्वंगु कारणं थुकिं यानाः गुट दुने हे अझ चीधंगु उपगुट निर्माण जुइगु तकया खतरा पिहां वयाच्वंगु दु ।
ओलीं नेपाल–खनाललिसे वार्ता याइगु ?

प्रधानमन्त्री लिसें नेकपा (एमाले) या अध्यक्ष केपी शर्मा ओलीं पार्टीया वरिष्ठ नेतापिं माधव नेपाल व झलनाथ खनाल सहित स्थायी कमिटीया बैठक सःतेगु तयारी यानाच्वंगु खँ सीदुगु दु ।

सर्वोच्च अदालतं थीथी मुद्दाय् सरकारया विपक्षय् निर्णय यायेगु लिसें प्रदेशय् नं एमालेया सरकार धमाधम विघटन जुजुं वनेवं वय्कलं आः पार्टी एकताया लागिं नेपाल–खनाल पुचःलिसे वार्ता यायेगु मनस्थिति दयेकादीगु खँ सूत्रं धाःगु दु ।

मेखे नेपाल–खनाल पुचलं धाःसा बैठक बारे पिहां वःगु खँ ‘बजारी हल्ला’ जक खः धाःगु दु । नेपाल पुचःया केन्द्रीय दुजः लिसें सांसद जीवनराम श्रेष्ठं नेपालभाषा टाइम्स लिसे खँ ल्हासें ओली पक्षं वःगु थज्याःगु खँयात पत्याः याये मछिंगु खँ कनादीगु दु ।

सांसद श्रेष्ठं यदि ओलीं पार्टीया स्थायी कमिटीइ वरिष्ठ नेतात दुथ्याकेगु बिचाः यानादीगु खःसा व स्वयां न्ह्यः निगू पुचःया दथुइ सम्झौता निं जुइमाःगु खँ कनादीगु दु । सम्झौता मजुइकं बैठकय् वनेगु खँ जुइ मखु धासें वय्कलं धयादिल, ‘दकलय् न्हापां केपी शर्मा ओलीं छिउगु असंवैधानिक पलाः लित कायेमाल, वयां लिपा निगू पक्षया दथुइ स्पष्ट सम्झौता जूसा जक बैठकय् वनेगु जुइ । अथे मजुइकं ओलीं सःतीगु बैठकय् वनेगु सम्भावना मदु ।’

सम्बन्धित बुखँ

LEAVE YOUR COMMENTS