येँ मनपां नेपालभाषा प्रवद्र्धन व सम्बद्र्धनय् बः बीगु

येँ मनपाया नीति तथा कार्यक्रम

येँ – येँ महानगरपालिकां महानगर लागाया फुक्कं स्कूलय् प्राथमिक तह तक मातृभाषां ब्वंकेगु ज्यायात प्राथमिकता बियाः न्ह्याकीगु जूगु दु । लिसें येँ देय्या आदिवासी नेवाःतय् मांभाय् नेपालभाषाया प्रवद्र्धन व सम्बद्र्धनय् बः बीगु खँ नं धाःगु दु । म्हीग येँ मनपाया मेयर विद्यासुन्दर शाक्यं जारी यानादीगु मनपाया नीति तथा कार्यक्रमय् थ्व खँ न्ह्यथनातःगु दु ।

अथे हे नेपालभाषा साहित्ययात च्वन्ह्याकेगु लागिं थ्व भासं साहित्य सिर्जना याइपिं महानगरया श्रष्टातय्त ‘महानगर साहित्य सिरपाः’ बीगु खँ नं नीति तिथा कार्यक्रमय् न्ह्यथनातःगु दु । येँ देय्या गुचमुच्च जुयाच्वंगु छेँपाखें जुइफुगु खतरायात ध्यानय् तयाः अज्याःगु थासय् हाउस पुलिङ यानाः एकीकृत वस्ती विकासया ज्याझ्वः न्ह्याका यंकेगु लिसें आः छेँखापतिकं पःखाः दनाः घेरे मयासे अन हरियाली विकास याना यंकेगु अवधारणा नं उकी उल्लेख दु । आः स्वनिगःयात छगू हे तःधंगु सहरया रुपय् विकास याना यंकेगु व उकिया लागिं अलग्ग हे कानून हयाः फुक्कं नगरतलिसे सहलह यायेगु खँ नं उकी दुथ्याः ।

स्वनिगःया कला, संस्कृति व सम्पदायात आय आर्जन समेत याये फइगु कथं विकास याना यंकेगु, येँदेय्या मौलिक परम्परा कायम यानाः महानगरयात आधुनिक सुविधां नं सम्पन्न याना यंकेगु व स्मार्ट सिटीया अवधारणायात पूरा यायेगु लक्ष्य नं नीति तथा कार्यक्रमं तःगु दु ।
पर्यटन व्यवसाययात च्वन्ह्याकेगु लागिं आः बहनी नं सेवा बीगु लिसें नेपालय् हे उत्पादित सामानया बजार व्यवस्थापन यायेत थाय्थासय् नाइट मार्केट समेत चायेके बीगु खँ नं न्ह्यथनातःगु दु ।

आः लानिपुखू जःखःया भौतिक संरचनात स्यंकाः वृहत् लानिपुखू दयेकेगु, भोटेबहालं लुँहितिपाखे वयेगु केन्द्रीय कारगार नापसं च्वंगु लँपु चायेका छ्वयेगु ग्वसाः नं उकी न्ह्यथनातःगु दु । भ्रष्टाचार विरोधी समाचार च्वइम्ह पत्रकारयात ‘महानगरीय सुशासन पत्रकारिता पुरस्कार’ बीगु निसें आः मनपाया थःगु हे मेट्रो एफएमयात व्यावसायीकरण याना यंकेगु खँ नं उकी न्ह्यथनातःगु दु ।