चलचित्रकर्मीतय्त सांस्कृतिक रुपान्तरण सिरपाः

येँ(नेपालभाषा टाइम्स)- चलचित्र विकास बोर्डं झिम्ह चलचित्रकःमिलिसें छगू संस्थायात ‘सांस्कृतिक रुपान्तरण पुरस्कार–२०८०’पाखें सम्मान याःगु दु । वंगु असोज ३ गते संविधान दिवसया लसताय् लाकाः सामाजिक व सांस्कृतिक ख्यलय् योगदान बिउगु धासें नीन्याद्वः तका दांया पुरस्कारं सम्मान याःगु खः ।

बोर्डया सभाकक्षय् जूगु ज्याझ्वलय् मूपाहां संचार व सूचना प्रविधिमन्त्री रेखा शर्मां नांजाःम्ह ख्यालिजुजु मदनकृष्ण श्रेष्ठ, वरिष्ठ अभिनेत्री मिथिला शर्मा, दयाराम दाहाल, मुकुन्द किशोर भट्टराई, श्याम सापकोटा, रेखा थापा, दीपाश्री निरौला, मनोज पण्डित, मीनबहादुर भाम, सिने पत्रकारलिसें निर्देशक विजयरत्न असंबरे व चलचित्रकर्मी कल्याण कोष संचालन समितियात म्हतिं नीन्याद्वः तका दांलिसें सम्मानपत्रसहित उगु पुरस्कार लःल्हाःगु खः ।

ज्याझ्वलय् मन्त्री शर्मा, पुरस्कृति व्यक्तित्वपाखें वरिष्ठ कलाकार मदनदास श्रेष्ठ, बोर्डया अध्यक्ष भुवन केसीं नुगःखँ तयादीगु खः ।