थनिंनिसें सार्वजनिक यातायात चले जुइगु

येँ (नेपालभाषा टाइम्स) – सरकारं चीहाकःगु दुरीया सार्वजनिक यातायात साधन सञ्चालन याकेबीगु निर्णय याःगु दु। मन्त्रिपरिषदया म्हिगः च्वंगु बैठकं उगु निर्णय याःगु खः । सरकारया प्रवक्ता लिसें अर्थ व सञ्चार तथा सूचना प्रविधि मन्त्री युवराज खतिवडां म्हिगः सार्वजनिक यातायात सञ्चालन याके बीगु निर्णय जूगु जानकारी बियादीगु खः ।

डा. खतिवडाया कथं स्वनिगःया हकय् येँ, यल व ख्वप जिल्ला दुने व स्वनिगः पिनेया हकय् सम्बन्धित जिल्ला दुने जक सार्वजनिक यातायात चले यायेदइ । सार्वजनिक यातायात चले यायेगु निंतिं चालक व सहचालकं मास्कया लिसें भाइजर व पञ्जा अनिवार्य रुपं छ्यलेमाः । उकथं हे सार्वजनिक यातायातया लुखाय् व यातायात दुने यात्रुं नं अनिवार्य रुपं मास्क तयेमाःगु खँ धाःगु दु ।

सार्वजनिक यातायात चले यायेगु झ्वलय् सामाजिक दूरी कायम यायेगु निंतिं सिटय् छम्ह जक यात्रु च्वनेदइसा न्हि छक्वः यातायात साधनयात निःसंक्रमण यायेमाःगु खँ धाःगु दु। सरकारं सार्वजनिक यातायात सञ्चालन याकेबिउसां नं ताःहाकःगु दूरीया सवारी साधन धाःसा चले यायेमदइगु खँ धाःगु दु ।

अथे हे थनिंनिसें ट्याक्सी नं चले याये दइगु जूगु दु। ट्याक्सी चले यायेगु झ्वलय् निम्ह जक यात्रु तयाः चले याकेगु निर्णय सरकारं याःगु दु। छखा हे छेँया छेँजः जूसा न्यादँ स्वयां क्वय्यापिं मस्तय्त नं तयेगु छुट बिउगु दु। तर न्ह्यःनेया सिटय् धाःसा चालक बाहेक मेपिं च्वनेमदइगु नियम नं हःगु दु। सिट क्षमता कथं यातायात सञ्चालन यायेबलय् व्यवसायीयात घाटा जुइगु जुयाः आः कायम जुयाच्वंगु भाडाय् ५० प्रतिशत तक थप कायेगु खँ मन्त्री खतिवडां धयादीगु दु। मन्त्री खतिवडाया कथं ट्याक्सीं धाःसा अप्वः भाडा काये दइमखु ।

सम्बन्धित बुखँ

LEAVE YOUR COMMENTS