नेपालय् हानं ६म्हेसित कोरोनाया संत्रमण

येँ – नेपालय् हानं ६म्हेसित कोरोना भाइरसया संक्रमणया पुष्टि जूगु दु । शनिवाः सुथय् पर्साय् २म्ह व बर्दिया, सिराहा, सर्लाही व चितवनय् छम्ह–छम्हेसित कोरोनाया संक्रमण जूगु दु ।

स्वास्थ्य तथा जनसंख्या मन्त्रालयया कथं बर्दिया नार्खु–११या २८दँया मिसा, सिराहा सखुवा–१९या ३०दँया मिजं व पर्सा वीरगञ्ज–१२या २८ व २९दँया मिजंतय्त संक्रमण जूगु दु । अथेहे सर्लाही रामनगर–४या १८दँया मिसा व चितवन गढौली–१या २५दँया मिसातय्त कोरोनाया संक्रमण जूगु खः ।

फुक्कसिया परीक्षण येँया राष्ट्रिय जनस्वास्थ्य प्रयोगशालाय् याःगु खँ मन्त्रालयं धाःगु दु । शनिवाः सुथय् ६म्ह न्हूपिं संक्रमितत नापं यानाः नेपालय् मुक्कं २७३म्ह कोरोनाया संक्रमण खनेदुगु दु ।