ने. सं. ११४३ चौलाथ्व पारू -

सरकारं पिहां वयेगु रास्वपाया निर्णयं पार्टी दुने असन्तुष्टि

येँ (नेपालभाषा टाइम्स)- प्रधानमन्त्री पुष्पकमल दाहाललिसे याःगु अन्तिम बार्गेनिङ नं सफल मजुइवं अन्ततः रास्वपां सरकार त्वःतेगु निर्णय याःगु दु । तर सरकार त्वःतूसां दाहाल सरकारयात बियातःगु समर्थन धाःसा कायम हे यानातःगु दनि ।

सर्वोच्च अदालतं लामिछानेया नागरिकता रद्द याना बीवं सांसद पद गुमे जूम्ह लामिछानें थः सांसद मखयेधुंकूसां नं हानं गृहमन्त्री हे जुइ माल धकाः माग यायेवं प्रधानमन्त्रीलिसे विवाद जूगु खः । प्रधानमन्त्री दाहालं वय्कःया पासपोर्ट सम्बन्धी मुद्दा अझ नं कायम हे दनिगु जुयाः व सिधयेधुंकाः जक गृहमन्त्री दयेके धकाः धायेवं लामिछानें सरकार त्वःतेगु ख्याच्वः बिउगु खः ।

सांसद मखुम्ह अध्यक्ष लामिछाने– यात गृहमन्त्री दयेके मखु धायेवं सरकार हे त्वःतेगु निर्णय याःगुलिं यक्वस्यां रवि लामिछानें थः जब मन्त्री जुइ मखनीगु खःसा थःगु पार्टीया मेपिंत जक छाय् मन्त्री याना तयेगु धकाः सरकार हे त्वःतेगु निर्णय याःगु अनुमान याःगु दु ।

सूत्रतय्सं धाःकथं रास्वपा सरकारं पिहां वयेगु धकाः जूगु थ्व निर्णययात पार्टीया गुलिखे सांसदतय्सं ययेकाच्वंगु मदु । सांसद विराजभक्त श्रेष्ठं रास्वपा धइगु ज्या यायेत मखु, गृहमन्त्री जुइत जक सरकारय् वंगु लानाच्वन धइगु नजिर थुकिं दयेका बीगु खँ धयादीगु दु ।

मेखे म्हिगः लामिछानें याःगु पत्रकार सम्मेलनय् वय्कलं पत्रकारतय्त तसकं ब्वः बियाः न्ववानादीगुलिं उकिया नं कडा आलोचना जूगु दु ।
थ्व निर्णय लिपा लामिछानेयात गृहमन्त्री बी हे माः धकाः दवाब बिया च्वनादीम्ह एमालेया अध्यक्ष केपी ओलीं आः छु यानादी धइगु खँ धाःसा पिहां मवःनि । अध्यक्ष ओलीं म्हिगः सदनय् न्ववायेगु झ्वलय् नं लामिछानेया पक्षय् बिचाः तयादीगु खः ।

लामिछानेयात सरकारं चीकेगु थ्व ज्या आः वइगु फागुनय् जुइगु राष्ट्रपति चुनावलिसे स्वापू दुगु खँ धाःगु दु । राष्ट्रपति चुनाव न्ह्यः हे वर्तमान सत्ता समीकरण हिले फइगु अनुमान नं याना हःगु दु ।