उपमेयरय् सुनिता डंगोलयात कीर्तिमानी मत

येँ – थुगुसी जूगु स्थानीय चुनावय् येँ मनपाय् एमालेपाखें उपमेयरउम्मेदवार सुनिता डंगोलं दकलय् अप्वः मत प्राप्त जूगुया कीर्तिमान तइगु जूगु दु । म्हिगः सनिलया ल्याः कथं वय्कःयात ६३ हजार ८४७ मत प्राप्त जुइधुंकूगु दु । थ्व नेपाःया फुक्क हे स्थानीय तहलय् सुं नं उम्मेदवारयात वःगु दकलय् अप्वः भोट खः । येँया मेयर पदया स्वतन्त्र उम्मेदवार बालेन्द्र साहयात आः तक ५६ हजार १४८ मत वःगु दु ।

येँय् मेयरयात स्वयां उपमेयरयात अप्वः वःगु दु । नेपाली कांग्रेसया मेयर उम्मेदवार सिर्जना सिंहयात ३५ हजार ४७८ मत वःगु दुसा एमालेया केशव स्थापितयात ३४ हजार ७५४ मत वःगु दु । अथे हे स्वतन्त्र उम्मेदवार सुमन साय्मियात ११ हजार ७६३ मत वःगु दु ।
आः तक त्याना वःपिं स्वयेबलय् येँ मनपा बोर्डय् नेपाली कांग्रेसया बहुमत दइगु स्पष्ट जूगु दु ।