आः येँनं ख्वप तक ४५ मिनेटं थ्यंके फइ

येँ (नेपालभाषा टाइम्स)÷येँया रत्नपार्कंनिसें ख्वपया सूर्यविनायक तक द्रुत बस सेवा शुरु जुल । भौतिक पूर्वाधार तथा यातायात मन्त्रालय व नेपाल यातायात व्यवसायी राष्ट्रिय महासंघया सहकार्यय् म्हिगःनिसें थ्व बस सेवा सुरु याःगु खः ।

म्हिगः भौतिक पूर्वाधार तथा यातायात मन्त्री प्रकाश ज्वालां रत्नपार्कया शान्तिवाटिकां उगु बस सेवा उलेज्या यानादीगु खः । उगु बस सेवाया नितिं लँय् ह्याउँक पानाः डेडिकेटर लेनया व्यवस्था याःगु दु । थन कार्यालय ई सुथय् ९ बजे निसें ११ बजे तक व न्हिनय् ४ निसें ६ बजे तक द्रुत बस सेवा सञ्चालन जुइ ।

स्वनिगःया यातायात क्षेत्रय् सुधार हयेगु आज्जु कथं थ्व सेवा शुरु याःगु खः । आःयात ४० सिटया २५ गः बस सञ्चालनय् वइ । अफिस टाइमय् ख्वपं येँय् वयेत सार्वजनिक यातायातय् निघौ ई कयाच्वंगु दुसा थ्व बस सेवां ४५ मिनेटय् सूर्यविनायकं रत्नपार्क थ्यनीगु खँ धाःगु दु । येँ व ख्वपया १९ गू थासं बस गयेगु व कुहां वये फइ ।