बुद्धया नांया गलत प्रयोगया विरोध
येँ (नेपालभाषा टाइम्स)- लुम्बिनी जुइत्यंगु विराट चक्र विज्ञान ध्यान कार्यक्रमय् बुद्धया नां गलतढंगं छ्यःगु धासें विरोध जूगु दु । धर्मोदय सभा लगायत झिंछगू संगठनतय्सं मंकाः कथं छगू वक्तव्य पिथँसें थुकिया विरोध याःगु दु ।
जीवन विकास फाउन्डेशनं वइगु चैत १७ निसें २३ गते तक लुम्बिनीइ ‘बुद्धको ज्ञान लुम्बिनीमा ध्यान – विराट चक्र विज्ञान’ नामं ध्यान विधि स्यनीगु ज्याझ्वः यायेत्यंगु दु । थुगु ज्याझ्वःया परिचयय् शरीरया न्हय्गू चक्रया उर्जा जागरण यायेगु विधि स्येनीगु खँ न्ह्यथनातःगु दु । तर फाउन्डेशनं स्यनेत्यंगु विराट चक्र विज्ञान सम्बन्धी ध्यान बुद्धया ज्ञान व ध्यान लिसे छुं नं सम्बन्ध मदुगुलिं बुद्धया नांयात गलत कथं प्रचार मयायेत विज्ञप्तिइ न्ह्यथनातःगु दु ।
नामय् बुद्धया ध्यान व ज्ञान धकाः धयाः यथार्थय् मेगु हे विषयवस्तु स्यनीबलय् साधनाया निंतिं वःपिं साधकतय्त धोखा जुइगु खँ न्ह्यथँसें थुगु ज्याझ्वलय् बुद्धया ध्यान धकाः उल्लेख मयायेत बौद्ध संगठनतय्सं इनाप याःगु दु । अथेहे थ्व ज्याझ्वलय् बुद्धयात ‘शान्तिया अग्रदूत’ धकाः धयातःगु मिले मजूगु धासें अथे मयायेत इनाप यानातःगु दु । बुद्धया सुयागुं दूत जुया वःगु मखसे थःगु हे पुरुषार्थ बोधिचर्या यानाः बुद्ध जूगु जूगुलिं वसपोलयात शान्तिया अग्रदूत धकाः धायेबलय् बुद्धया सम्मान मजुइगु खँ विज्ञप्तिइ धयातःगु दु ।
थुगु विज्ञप्ति धर्मोदय सभा, बौद्ध विहार संघ, नेपाल परम्परागत बौद्ध धर्मसंघ, वज्राचार्य संरक्षण गुथि, युवक बौद्ध मण्डल नेपाल, ललितपुर बुद्ध जयन्ती कोष, व्योमकुसुम बुद्धधर्म संघ, लोटर रिसर्च सेन्टर, देकी छोइलिङ गुम्बा बौद्ध धर्मसंघ, वज्राचार्य पुजा विधि अध्ययन समिति, बौद्ध महिला संघं मंकाः कथं पिथंगु खः ।
LEAVE YOUR COMMENTS