यल महानगरया बजेट पारित
यल-यल महानगरपालिकां चालु आर्थिक दँ ०७८÷७९या निंतिं बजेट पारित याःगु दु । यल महानगरया नकतिनि क्वचाःगु खुक्वःगु नगरसभां उगु बजेट पारि याःगु खः ।
यल महानगर प्रमुख चिरिबाबु महर्जनं चालु आर्थिक दँया निंतिं नकतिनि क्वचाःगु नगरसभां ५गू करोड ५५ गू करोड ५५ गू लख तका दांया बजेट पारित याःगु जानकारी बियादिल । महानगरप्रमुख महर्जनयाकथं विनियोजित बजेटमध्ये चालु खर्चपाखे ९१ गू करोड ६१ गू लख न्यय्न्हय्द्वः तका व पूँजीगत खर्चपाखे ३ गू अर्ब २४ गू करोड ३० गू लख दु ।
थुकथं हे विकास सुचकांकया लिधंसाय् यल महानगरया वडायात स्वब्वय् ब्वथलाः चालु आर्थिक दँया निंतिं बजेट विनियोजन याःगु दु । विनियोजित बजेटमध्ये १३ गू वडायात दकलय् अप्वः ३ गू करोड २५ गू लख, ८ गू वडायात २ गू करोड ५० गू लख व ल्यं दुगु ७ गू वडायात निगू करोड १५ गू लख विनियोजन याःगु दु ।
साविकया उपमहानगरपालिकायात महानगरपालिकाय् रुपान्तरण यायेगु झ्वलय् थुकी दुथ्याःगु वडाय् आपालं ज्या याये ल्यं दुुगु व उकिया निंतिं हे अप्वः बजेट विनियोजन यानागु वय्कलं कनादिल ।
थुकथं हे यल महानगरपालिकां महानगरीय परियोजना अन्तर्गत वडा नं. ११ य् निर्माण यायेत्यंगु विद्युतीय शवदाह गृहया निंतिं नं बजेट विनियोजन याःगु दु । शवदाह गृहया निंतिं १ गू करोड बजेट विनियोजन याःगु दु ।
अथे हे थनया लगंख्यलय् च्वंगु सप्तपाताल पुखू व लगंख्यलं सातदोबाटोय् वनेगु लँय् च्वंगु राजदल गण परिसरया पुखूया निंतिं न्यागू करोड बजेट विनियोजन याःगु दु । थ्व हे झ्वलय् वडा नं. १३ य् च्वंगु पंचेश्वर महाद्यःया देगः पुनःनिर्माण, वडा २१ य् च्वंगु रुद्रायणी देगः, २४ वडाया आयुर्वेदिक अस्पताल व २७ वडाय् कृष्ण द्यःया देगः थ्व हे आर्थिक दँय् पुनःनिर्माण शुरु यायेत्यंगु दु ।
LEAVE YOUR COMMENTS