बसुन्धराया देवीया धलं दनेज्या

येँ – बसुन्धरा देवीया देगः परिसरय् बसुन्धराया धलं दनेगु (तिला व्रत) च्वनेगु ज्या जुल । कपिल मुनि स्थापित व वय्कःया परिवारं उगु धलं मुंकेगु ज्या यानादीगु खः । मुलाचार्य दशरत्न वज्राचार्यं पुजा याना बिज्याःगु धलं दनेज्या त्रिरत्न वज्राचार्यं यानाबिज्याःगु खःसा विकासरत्न वज्राचार्यं बाखं कनाबिज्याःगु खः ।

मुक्कं निसः व च्याम्ह भक्तजनपिंसं ब्वति काःगु धलं दनेज्याय् पुजाआजा यायेगुलिइ गुरुजुपिं बिजेन्द्रमुनि वज्राचार्य, बसन्तहर्ष वज्राचार्य व गुरुमांपिं सरला वज्राचार्य (छत्रपाति), जेनिसा वज्राचार्य, सरला वज्राचार्य (ओमबहाः) पाखें विशेष ग्वाहालि यानाबिज्याःगु खः ।

धलं दनेगु ज्याय् स्थापित खलःपाखें नं विशेष ग्वाहालि याःगु खः । धलं दनेगु ज्याय् अप्वःथें मिसातय् सहभागिता दुगु खःसा मिजंतय्सं नं धलं दंगु खः । बसुन्धरा देवी म्हासुगु वर्णया जूगुलिं धलं दंपिं सकसिनं म्हासुगु हे वसतं पुनाः धलं दनेगु ज्याय् ब्वति काःगु खः ।