मरु सतः अलपत्र जुइन
येँ (नेपालभाषा टाइम्स)÷वंगु २०७२ सालया तःभुखाचय् पाःताः जुइक दुना वंगुलिं हानं पुनर्निर्माण याःगु ऐतिहासिक मरु सतः दयेके क्वचाःसां सर्वसाधारणया लागिं खुला यायेगु ज्या धाःसा अलपत्रय् लाः वंगु दु ।
शुरुइ मरु सतः दुने च्वंगु प्यम्ह गणेद्यः व गोरखनाथया मूर्ति हिलाः न्हूगु तल धइगु खँय् विवाद जुयाः खुला यायेगु ज्या लिबाः वंगु खःसा आः सतः चायेकेगु खँय् येँ मनपां नं वास्ता मयाःगुलिं थ्व ऐतिहासिक सम्पदा गबले खुला जुइ धकाः धाये मफयावंगु खँ धाःगु दु ।
सतः दुने च्वंगु पुलांगु मूर्ति लिकयाः न्हूगु तःगु खँय् सर्वोच्च अदालतय् मुद्दा लानाच्वंगु दु । सतः दुने च्वंगु थ्व मूर्ति भुखाचय् लानाः क्षति जूगुलिं काष्ठमण्डप पुनर्निर्माण समितिं
खण्डित मूर्ति पुज्यायेगु झीगु चलन मदु धासें अन न्हूगु हे मूर्ति दयेकाः पलिस्था याःगु खः । तर सम्पदा अभियन्तातय्सं मरु सतःया पुरातात्विक महत्वया मूर्ति लिकयाः न्हूगु मूर्ति तये हःगु कानुन सम्मत मजू धासें उकिया विरुद्ध रिट तया बिउगु खः । थुकियात कयाः सर्वोच्चय् तःक्वःमछि पेशी जुइधुुंकूगु दु ।
थ्वहे झ्वलय् वंगु माघ १५ गते च्वंगु पेशीइ मरु सतः दुने खण्डित मूर्ति तयाः पुजा याये जिउ लाकि मजिउ अले न्हूगु मूर्तिया नापं खण्डित मूर्ति तये जिउ लाकि मजिउ राय बियादिसँ धकाः संस्कृत विश्वविद्यालययात इनाप याःगु दु । सर्वोच्चं संस्कृत विद्यालययात पौ छ्वसें आः वइगु स्वलाया दुने थुकिया शास्त्रसम्मत राय बियादिसँ धकाः इनाप याःगु खः । संस्कृत विश्वविद्यालयं थुकिया बारे राय धाःसा बिउगु मदुनि । आः अनया राय वयेधुंकाः जक सर्वोच्चं थुकिया अन्तिम फैसला न्यंकीगु जूगु दु ।
थ्वहे झ्वलय् काष्ठमण्डप पुनर्निर्माण समिति नं थःपिनि ज्या सिधःसां भंग याये मफयाच्वंगु खँ उकिया नायः लिसें पुलांम्ह सांसद राजेश शाक्यं कनादीगु दु । थःपिंसं मरु सतःया अन्तिम प्रतिवेदन तयार यानाः मनपायात मरु सतःया ताःचा समेत बुझे याः वनागु इलय् मनपां प्रतिवेदन जक लःल्हाना कयाः ताःचा धाःसा मकाःगु खँ वय्कलं कनादिल । अथे हे मरु सतः पुनर्निर्माणय् संलग्न जूपिं गुलिखे मनूतय्त बीमानिगु ध्यबा मनपां निकासा मयानाः समस्या जुयाच्वंगु खँ नं वय्कलं कनादिल ।
LEAVE YOUR COMMENTS