प्रदेश १ य् नं परमादेश सरकार !
येँ (नेपालभाषा टाइम्स)÷प्रदेश १ (कोशी) प्रदेशय् एमालेया ‘परमादेश सरकार’ गठन जूगु दु । मुख्यमन्त्री उद्धव थापां काःगु विश्वासया मत संविधान कथं पाय्छि मजू धासें सर्वोेच्च अदालतं एमालेया प्रदेश संसदीय दलया अध्यक्ष हिक्मतकुमार कार्कीयात ४८ घौया दुने मुख्यमन्त्री नियुक्त या धकाः परमादेश जारी याःगु खः ।
परमादेश कथं म्हिगः प्रदेश प्रमुख परशुराम खापुङं प्रदेश संसदया दकलय् तःधंगु पार्टीया नेता कथं एमालेया कार्कीयात मुख्यमन्त्री नियुक्त याःगु दु । थुकिया नापनापं सरकारय् वनीपिं मन्त्रीतय् नां नं म्हिगः एमाले तयार याःगु दु । थुकी तिलकुमार मेयाङ्बो, पाँचकर्ण राई, एकराज कार्की, सृजना राईया नां न्ह्यःने वःगु दु ।
प्रदेश १ (कोशी) य् एमालेपाखें परमादेशया सरकार गठन यायेवं गुलिसिनं आः एमालेया न्ह्यःने नैतिक न्ह्यसः पिदंगु खँ समेत धाःगु दु । २०७८ सालय् एमाले अध्यक्ष केपी ओलीया सरकार क्वः थलाः शेरबहादुर देउवायात सरकार दयेके बिउ धकाः सर्वोच्च अदालतं परमादेश जारी याःगु खःसा अबलय् एमालें उगु सरकारयात ‘परमादेश सरकार’ धकाः आलोचना याःगु खः । आः अज्याःगु हे परमादेशपाखें प्रदेशय् थःगु हे पार्टीया सरकार गठन जुइत्यंगुयात एमालें गुकथं काइ धकाः न्ह्यसः तयाहःगु दु ।
म्हीग न्यायाधीशपिं नहकुल सुवेदी, कुमार चुडाल व सपना प्रधान मल्लया मंकाः इजलाशं मुख्यमन्त्री उद्धव थापां विश्वासया मत काःगु इलय् सभाया सभापतित्व यानाच्वंम्ह इस्राइल मन्सुरीं याःगु मतदान संविधानतः पाय्छि मजूगु कारणं मुख्यमन्त्री थापायात बहुमत प्राप्त मजुल धकाः फैसलायाःगु खः । सभामुख जुया च्वंम्हेस्यां ‘मत बराबर जूसा’ जक मतदान याये खनीगु संवैधानिक प्रावधानयात त्वःताः प्रस्तावया विपक्षय् ३० मत जक वःगु इलय् हे मतदान याःवंगु जुयाः थ्व बदरभागी जुइ धकाः फैसला याःगु खः ।
पहिचानआन्दोलन नं तच्वइगु
प्रदेश १ (कोशीप्रदेश) य् सरकार गठन यायेगु अवसर प्राप्तजूसां मुख्यमन्त्रीहिक्मतकुमार कार्कीयात सरकार न्ह्याके धाःसाअःपु मजुइगु खँधयाहःगु दु । खास यानाःप्रदेशय् पहिचानपक्षधरतय्सं न्ह्याकाच्वंगु ‘कोशीनामाकरण’ विरुद्धया आन्दोलनं वय्कःयात ज्या याये थाकुइफुगु खँधाःगु दु ।
प्रदेशय् थःगु हे कथंया राजनीतिकचलखेल जुयाच्वंगुलिं दिपाःकयाच्वंगु पहिचानपक्षधरतय्गु आन्दोलन आःन्हूगु सरकार गठनया नापनापं तच्वयावइगु खँधाःगु दु । थ्वप्रदेशयात ‘कोशी’ नां तयेगु ज्या मुख्यमन्त्रीकार्कीं हे याःगु जुयाःआन्दोलनकारीतय्सं वय्कःयातविशेष निशानाय् तयातःगु दु । छकः वय्कःया गाडीइ आक्रमण नं यायेधुंकूगु दु । आः वय्कः हे हानं सत्ताय् लिहां वःगुलिं आन्दोलनकारीतय्सं आन्दोलन अझतच्वयेक न्ह्याके फइगु खँधाःगु दु ।
LEAVE YOUR COMMENTS