४४ दँ लिपा खुया यंकूगु बुद्ध मूर्ति प्रतिस्थापन

येँ(नेपालभाषा टाइम्स)- स्वनिगःलिसें देय्या थीथी थासं खुया यंकूगु मूर्तित प्रतिस्थापन यायेगु ज्या धमाधम जुया वयाच्वंगु दु । थ्व झ्वलय् भ्वतय् नं थनिं ४४ दँ न्ह्यः खुया यंकूगु बुद्ध मूर्ति प्रतिस्थापन याःगु दु ।

बनेपा नगरपालिका वडा नं. ८ वहित्वाःस्थित बहाःबही ज्ञान विहारं खुया यंकूगु बुद्ध मूर्ति प्रतिस्थापन याःगु दु । वि.सं. २०३५ सालय् वहित्वाःया देगलं खुया यंकूगु शाक्यमुनि बुद्धया मूर्ति हालय् जन प्रतिस्थापन याःगु खः ।

४४ दँ न्ह्यः खुया यंकूगु बुद्धया उगु मूर्ति राष्ट्रिय संग्रहालय छाउनीइ लूगु खः । तत्कालीन इलय् देगलं खुया यंकूगु उगु मूर्ति विदेश यंकेत्यंगु इलय् विमानस्थलय् लुइकाः छाउनीस्थित राष्ट्रिय संग्रहालयय् तयातःगु खः ।

संग्रहालयया कार्यकारी निर्देशक जयराम श्रेष्ठं धातु व मेटलं दयेकातःगु उगु मूर्ति स्थानीयया आस्था व धरोहरया रुपय् दुुगु खँ कनादीगु दु । १७ औं शताब्दीया कलात्मक रुपय् निर्माण यानातःगु उगु मूर्ति तंगु लगत्तै हे विहारया पदाधिकारी व स्थानीयवासीं माला बीत धासें पुरातत्व विभागय् निवेदन बियातःगु खः ।

मूर्ति मालेगु झ्वलय् छाउनीस्थित संग्रहालयय् तयातःगु पत्ता लगे जुइवं मूर्ति लित यंकेत आवश्यक सकतां प्रक्रिया पूवंकाः लित बियागु व अनंलि मूर्ति प्रतिस्थापन याःगु निर्देशक श्रेष्ठं कनादिल । बनेपा नगरपालिका, विहारया पदाधिकारी व स्थानीयया पहलय् बाजंसहित मूर्ति यंकाः प्रतिस्थापन याःगु खः ।