जुइ ला स्वनिगलय् हाकनं लकडाउन ?

येँ (नेपालभाषा टाइम्स) – स्वनिगलय् न्हिथं कोरोनाभाइरसया संक्रमण अप्वया वनेवं येँ हाकनं ‘लकडाउन’ तयेगु बारे सहलह शुरु जूगु खँ सीदुगु दु। लिपांगु इलय् स्वनिगलय् न्हिं न्यय्म्ह स्वयां अप्वः कोरोना संक्रमित खनेदयेवं उकथं सहलह शुरु जूगु खः ।

सरकारं वंगु साउन ६ गते निसें लकडाउन अन्त्य यायेवं स्वनिगलय् चीहाकःगु दुरीया सार्वजनिक यातयात, उद्योग, कलकारखाना, सरकारी कार्यालय व पसः चायेगु शुरु जूगु खः । तर थुकिया लिसें कोरोना संक्रमित जूपिनिगु ल्याः नं अप्वया वयेवं स्वनिगः उच्च जोखिमय् लाःगु विश्लेषण यासें हाकनं छकः लकडाउन यायेमालीगु अवस्था ब्वलंगु खँ पिहां वःगु खः । स्वास्थ्य मन्त्री भानुभक्त ढकालं नं पनां पने मफइगु अवस्था वल धाःसा लकडाउन जुइफइगु खँ धायेधुंकूगु दु। वय्कलं धयादीगु दु, ‘लकडाउन चायेकागु इलय् हे माल धाःसा हाकनं थ्व स्वयां लकडाउन यायेमालेफु धयागु खः ।’

अथेहे मेम्ह छम्ह मन्त्रीं प्रधानमन्त्री केपी शर्मा ओली व मन्त्रीपिं महामारीया अवस्था स्वयाः माल धाःसा हाकनं लकडाउन यायेगु मनस्थिति दुगु खँ धयादीगु दु। उम्ह मन्त्रीं धयादी, ‘येँया लिसे स्वनिगः पिनेया छुं जिल्लाय् महामारीया जोखिम अप्वया वनाच्वंगुलिं हाकनं छकः लकडाउन यायेमाःगु अवस्था वयेफु। लकडाउन यायेमाःगु सुझावत नं वयाच्वंगु दु ।’

आः लकडाउन यायेमाल धाःसा स्वनिगः लिसे महामारी अप्वया वनाच्वंगु छुं जिल्लाय् जक निवाः स्ववाःया निंतिं जक लकडाउन जुइगु जानकारी नं वय् कलं बियादीगु दु। वय्कलं धयादी, ‘न्हापा थें फुक्क थासय् लकडाउन यायेगु मखुसें, जोखिम अप्वया वनाच्वंगु थासय् जक आवश्यकता स्वयाः लकडाउन यायेगु जुइ ।’

मेखे कोविद-१९ संकट व्यवस्थापन समिति (सिसिएमसी) धाःसा आः तुरुन्त हे लकडाउन यायेगु पक्ष मदुनि । सिसिएमसी आःयात मनूत पिहां जुइगुली कडाइ यायेमाः धयागु पक्षय् जक दु। उकिं छुं म्हीग निसें येँ पिने जिल्लां दुहां वयेगुली कडाइ यायेगु कथं चान्हय् दुहां वये मदइगु यायेधुंकूगु दु ।

सिसिएमसीया सचिव महेन्द्र गुरागाँइनं पिनें स्वनिगः वये चाहे जूपिं अप्वया वनाच्वंगु धासें थुकियात कडाइ पूर्वक पनेमाःगु खँ धयादी । ‘निजी गाडी नं मनूत ल्ह्ययेगु ज्या यानाच्वंगु दु, थुकी कडाइ यायेमाः’ वय्कलं धयादीगु दु। वय्कलं जोखिमय् लाःगु जिल्लायापिं अत्यावश्यक जूसा जक स्वनिगलय् दुहां वये दइगु व सामान्य जिल्लायापिं नं पास कयाः जक स्वनिगलय् दुहां वये दइगु खँ धयादीगु दु ।

वय्कःया कथं पिनें वइपिंत कडाइ यानाः स्वनिगलय् च्वनाच्वंपिनि परीक्षण अप्वयेका यंकल धाःसा लकडाउन यायेमाली मखु धयागु सिसिएमसीया बिचाः दु। वय्कलं धयादी, ‘न्हय्न्हु च्यान्हु पिनें वइपिंत कडाइ यात धाःसा लकडाउन हे यायेमाली मखु धयागु सिसिएमसीया निष्कर्ष दु ।’

संक्रमितत २० हजार थ्यन
येँ (नेपालभाषा टाइम्स) – लकडाउन चायेकेधुंकाः नेपालय् न्हियान्हिथं संक्रमितत अप्वया वनेगु झ्वलय् म्हिगः जक ३१५ म्ह संक्रमितत थप जूगु दु। लकडाउन चायेके न्ह्यः दकलय् म्हो न्हि ५३ म्ह तक संक्रमितत खनेदुगुली आः धमाधम संक्रमितत अप्वया वयेवं नेपालय् संक्रमण जूपिनि ल्याः नं २० हजारं थहां वनेधुंकूगु दु। म्हिगः संक्रमितत सहित नेपालय् आः २० हजार ८६ म्हेसित संक्रमित जूगु पुष्टि जूगु दु ।

म्हिगः संक्रमितत जूपिं मध्ये स्वनिगलय् खुम्हेसित संक्रमण खनेदुगु दु। थुपिं मध्ये न्याम्ह येँयापिं लाःगु दुसा छम्ह ख्वपयाम्ह लाःगु दु। अथेहे कोरोनां सीपिनि ल्याः ५६ म्ह थ्यंगु दु ।

सम्बन्धित बुखँ

LEAVE YOUR COMMENTS