मेलम्ची अन्तिम चरणय्, मोहनितकया दुने लः वइगु

येँ – बहुप्रतिक्षित मेलम्चीया लः स्वनिगलय् हयेगु निंतिं अन्तिम चरणय् थ्यनेधुंकूगु दु । राष्ट्रिय प्राथमिकताय् लाःगु महत्वपूर्ण परियोजना मध्ये छगू मेलम्चीया लः स्वनिगलय् वितरण यायेगु निंतिं मेलम्ची खानेपानी आयोजन पूर्णताया अन्तिम चरणय् थ्यंसां लः त्वनेत धाःसा अझं छुं ई पीमालीगु जूगु दु ।सम्भवतः आः वइगु मोहनितकया दुने स्वनिगःवासीतय्सं मेलम्चीया लः त्वने खनीगु जुइ । खतुं वंगु मोहनिया इलय् हे मेलम्चीया लः स्वनिगःवासीया हितिं हायेकेगु जुल धकाः व्यापक रुपं प्रचार यायेगु नापं व हे कथं ज्या जूगु खःसां अन्तिम इलय् वयां उकिं सार्थकता धाःसा कायेमफुत । तर, आः वइगु मोहनिया इलय् धाःसा स्वनिगःया छेँखाछेँखाय् हितिं मेलम्ची लः हाइगु पक्का जूगु हाकनं छक्वः दावी यायेगु ज्या जूगु दु ।

वंगु मोहनिया इलय् सम्भव मजुइवं वयांलिपा मंसिर, पुस, माघय् मेलम्चीया लः वितरण यायेगु जुइ धकाः नं धाःगु खः, तर अबलय् नं सम्भव मजुल । अर्र्बाै तका बजेटया विशाल परियोजना अन्तर्गतया मेलम्चीया लः स्वनिगःवासीया हितिं हाइगु आः धाःसा पक्कापक्की जूगु दावी याःगु दु । मेलम्चीया लः स्वनिगलय् वितरणया निंतिं सरकारं ठोस कार्ययोजना नं सार्वजनिक याःगु दु । एसियाली विकास बैंक (एडीबी)या ग्वाहालिइ संचालन जुयाच्वंगु परियोजनाया वार्षिक समीक्षा मुँज्याय् खानेपानी तथा आपूर्ति व सरसफाइ मन्त्रालयं मेलम्चीया लः वितरण सम्बन्धी ठोस कार्ययोजना सार्वजनिक याःगु खः ।

मन्त्रालयया योजनाकथं यदि कार्यसम्पादन यायेत दथुइ छुं नं कथंया पंगः वा समस्या पिहां मवल धाःसा वइगु चैत तकया दुने २६ किलोमिटर सुरुङ निर्माणया ज्या क्वचाइ । सुरुङ निर्माण क्वचायेवं न्हिं १७ करोड लिटर मेलम्चीया लः प्रशोधनया निंतिं सुन्दरीजलय् च्वंगु प्रशोधन केन्द्रय् क्वफायेगु ज्या जुइ । कार्ययोजनाकथं असारया अन्त्यतकया दुने सुन्दरीजल प्रशोधन केन्द्रपाखें निर्मलीकरण याःगु लः आरुबारी, बाँसबारी, पानीपोखरी, ल्हुति, महांकाल, अनामनगर, किपू, खुमलटार, टिगनी, मीनभवन, ख्वपया कटुञ्जे यानाः झिंछगू थासय् च्वंगु लःट्यांकीइ संकलन यायेगु जुइ व अनं हे परीक्षणया रुपय् लः प्रवाह यायेगु ज्या जुइ ।