काठमाडौं सुनचाँदी व्यवसायी संघया नेतृत्वय् रोहिनीदेवी शाक्य

येँ (नेपालभाषा टाइम्स)- काठमाडौं सुनचाँदी व्यवसायी संघया अध्यक्षय् रोहिनीदेवी शाक्य निर्वाचित जूगु दु । संघया शनिवाः जूगु न्हय्क्वःगु अधिवेशन व नीछक्वःगु साधारण सभां शाक्यसहित सकलें पदाधिकारी निर्विरोध निर्वाचित याःगु खः ।

न्हूगु कार्यसमितिइ उपेन्द्रकाजी शाक्य, मुक्तिरत्न वज्राचार्य व दशरत्न वज्राचार्य उपाध्यक्ष, लेखरत्न शाक्य सचिव, रमेशमान शाक्य कोषाध्यक्ष, अभिषेक शाक्य सचिव व पदमेश शाक्य सहकोषाध्यक्षय् ल्यःगु खःसा सदस्यय् सूर्यरत्न वज्राचार्य, सुरेन्द्रकाजी शाक्य, सुजेन शाक्य, निकेशरत्न वज्राचार्य, मनिष शाक्य, उजिना शाक्य, मोहिनी शाक्य, संजयरत्न शाक्य, माणिकरत्न शाक्य, रविन्द्र शाक्य, कबीरचन्द्र वज्राचार्य, सन्दीप शाक्य व अरुणा श्रेष्ठयात ल्यःगु खः ।

संघया साधारण सभा व अधिवेशन युवा तथा खेलकूदमन्त्री विराजभक्त श्रेष्ठं उलेज्या यानादीगु खः । ज्याझ्वलय् न्ववानादिसें वय्कलं थः नं परम्परां निसें लुँवहः व्यवसाय जुइगु मू थाय् वंघः, भेडासिंलय् हुर्के जूम्ह खः धयादिसें थःम्हं थ्व व्यवसायय् वयाच्वंगु चुनौति व अवसरयात बांलाक खनावयाच्वनागु दु धयादिल । दशकौंया राजनीतिक निराशाया कारणं यक्व ख्यलय् ल्याय्म्ह पुस्ता आकर्षण म्हो जुयावंथें थ्व व्यवसायय् नं ल्याय्म्ह पुस्ता न्ह्याकीमखु धयागु चिन्ता जुया वयाच्वंगु खँ वय्कलं धयादिल । थ्व झ्वलय् वय्कलं लँवह व्यवसाययात नं पुरातन शैली मखु, नवीनत सोच ज्वना न्ह्याकेमाः धासें ल्याय्म्ह पुस्तायात थुकिया निंतिं सक्षम यायेगु निंतिं थःगु मन्त्रालयं छु यायेफु, व यायेगु जुइ धयादिसें ल्याय्म्ह पुस्ताया निंतिं यायेफइगु ज्याया प्रस्ताव हयेत नं वय्कलं धयादिल ।

अथेहे नेपाल सुनचाँदी व्यवसायी महासंघया अध्यक्ष माणिकरत्न शाक्य थौंकन्हय् लुँवहः व्यवसाय धायेसातं हे लुँ तस्करीलिसे स्वानाः स्वइगु अवस्था वयाच्वंगु खँ न्ह्यथँसें तर लुँया तस्करी व्यवसायीतय्सं मखु, ततःधंपिं नेता, उच्चपदस्थ कर्मचारी व प्रहरी अधिकृततय्सं यानाच्वंगु खँ धयादिल । वय्कलं धयादिल, ‘लुँ तस्करी सम्बन्धी छानविन यायेत सरकारं गठन याःगु उच्चस्तरीय छानविन आयोगं नकतिनि हे जक सरकारयात प्रतिवेदन बिउगु दु । उगु प्रतिवेदनय् तस्कर याइपिनि नां धलखय् लुँवह व्यवसायीत मदु, उकी ला ततःधंपिं नेता, उच्चपदस्थ कर्मचारी व प्रहरी अधिकृततय् जक नां दु ।’

थ्व झ्वलय् वय्कलं नेपालय् लुँ हयेगु निंतिं दयेकातःगु कोटा प्रणालीया कारणं हे लुँया तस्करीयात अप्वयेकाच्वंगु खँ धयादिल । ‘नेपालय् बैंकतय्सं जक न्हि १० किलो, २० किलो लुँ हयेगु यानाच्वंगु दु, गुगु लुँ नेपाःया बजाःयात मगाः । थ्व हे कारणं लुँ तस्करी यानाः वयेगु अप्वया च्वंगु खः । यदि बजारय् गाक्क लुँ न्यायेगु दत धाःसा तस्करी यानाः लुँ वइमखु जुइ ।’

वय्कलं लुँ तस्करी सम्बन्धी उच्चस्तरीय छानविन आयोगं सरकारयात बिउगु प्रतिवेदनय् सरकारयात खुल्ला बजार सिद्धान्तया आधारय् लुँ आपूर्ति याकेमाःगु सुझाव बिउगु खँ न्ह्यथँसें आयोगं पब्लिक कम्पनीतय्त नं लुँ आपूर्ति याकेमाःगु सिफारिस सरकारयात याःगु खँ धयादीगु खः ।

सहभागी सकसितं लसकुस यासें ज्याझ्वःया सभापति सुरेश शाक्यं भन्सार पुलां विदेशं लुँ ज्वना वःपिंके लुँ न्याःसां तकं लुँवहः व्यवसायीतय्त ज्वनेगु ज्या यानाच्वंगु खँय् चिन्ता प्वंकादिल ।

उपेन्द्रकाजी शाक्यया संयोजनय् जूगु ज्याझ्वलय् राष्ट्रिय उपभोक्ता मञ्चया नायः प्रेमलाल महर्जनं नं न्ववानादीगु खः । अथेहे ज्याझ्वलय् संघया उत्कृष्ट कर्मचारीपिं शैलेन्द्र शाक्य व सुवर्ण शाक्ययात नं सम्मानित याःगु खःसा संघया सदस्यपिनि सन्तानपिं मध्ये २०७९ सालया एसईई परीक्षाय् दकलय् अप्वः ल्याः हःपिंत पदक नं लःल्हाःगु खः ।