क्यानाडाय् बिस्कं कथं नेवाः दिवस

येँ – थुगुसी विश्वया थीथी थासय् विश्व नेवाः दिवस हनेगु झ्वलय् क्यानाडाय् छम्ह क्यानाडियन नागरिकयात हे नेवाः भासं भाषण याकाः ज्याझ्वः न्ह्याकेगु ज्या जुल ।
क्यानेडियन नेवाः गुठीया ग्वसालय् जूगु उगु ज्याझ्वलय् अनया हे टोरोन्टो विश्वविद्यालयपाखें ‘नेवाः बौद्ध धर्म’ विषयय् पीएचडी यानाच्वंम्ह विद्यार्थी भाजु इयन टर्नरं नेवाः भासं सम्बोधन यानादीगु खः । भाजु टर्नर क्यानेडियन नागरिक खः ।

नेवाः भासं सम्बोधन यासें वय्कलं नेवाःतय्गु छेँय् छेँय् जुइगु बुद्धया पुजाया बारे अध्ययन यायेत थः नेपाः वनाबलय् जूगु अनुभव कनादीगु खः । थःगु अध्ययनया लागिं हे थम्हं नेवाः भाय् नं सयेकागु खँ कँसें उकिया लागिं क्यानेडियन नेवाः गुठीं यक्व ग्वाहालि याःगु खँ नं कनादिल । लिसें गुठीया हे ग्वाहालि कयाः नेपालय् थम्हं आपालं मनूत नापलाये फुगु व उमिगु ग्वाहालि काये फुगु खँ नं टर्नरं कनादिल ।

थःगु पीएचडीया थेसिस च्वयेत नेपाःया यक्व हे नेवाःतय्सं थःत ग्वाहालि याःगु खँ कँसें वय्कलं थः हानं नेपाः वनाः अध्ययन याये मानिगु खँ नं कनादिल । लिसें थःगु पीएचडी सिधयेकाः नेवाः भाय्यात च्वन्ह्याकेगु लागिं थम्हं कुतः यायेगु बचं नं वय्कलं बियादिल ।नेवाः दिवसया लसताय् गुठीं क्यानाडाय् च्वंपिं नेवाःत मुनाः बिचाः ब्याकेगु व नेवाः नसात्वँसा नयेगु ज्याझ्वः याःगु खः ।

सम्बन्धित बुखँ

LEAVE YOUR COMMENTS