कुवेतय् नेपाःलिसें स्वीगू देय्यात प्रतिबन्ध

येँ (नेपालभाषा टाइम्स) – खाडी दे कुवेतं भारत व चीन लिसें स्वीगू स्वयां अप्वः देय्या यात्रुतय्त कुवेत दुहां वयेत प्रतिबन्ध तःगु दु। कुवेती नागरिक उड्डयन प्राधिकरणया महानिर्देशकं फुक्कं विमान सेवा कम्पनीतय्त छगू पौ च्वयाः सरकारया थुगु आदेश पालना यायेत इनाप याःगु दु ।

कुवेत सरकारं सार्वजनिक याःगु लिपांगु धलखय् दुथ्याःगु देशय् नेपाः लिसें भारत, इरान, चीन, ब्राजिल, कम्बोडिया, आर्मेनिया, बंगलादेश, फिलिपिन्स, सिरिया, स्पेन, सिंगापुर, बोस्निया हर्जगोभिना, श्रीलंका, इराक,मेस्किको, इन्डोनेसिया, चिली, पाकिस्तान, इजिप्ट, लेबनान, हंगकंग, इटाली, मोल्डोभा, पनामा, बेरुत लाःगु दु। कुवेतं व्यावसायिक उडानत आशिंक खुला याःकुन्हु हे कुवेत सरकारं न्हूगु प्रतिबन्ध घोषणा याःगु खालिज टाइम्सं धाःगु दु। समाचार कथं कुवेत अन्तर्राष्ट्रिय विमानस्थल शनिवाःनिसें ३० प्रतिशत चाःगु खः ।

अमेरिकाया जोन्स हप्किन्स विश्वविद्यालयया कथं कुवेतय् आःतक ६७ हजार ४४८ म्हेसिके कोरोना संक्रमण खनेदुगु ४५३ म्ह मृत्य जूगु दु ।