नकःमि समाजया बेकरी तालिम

येँ(नेपालभाषा टाइम्स)- नकःमि समाज सेवा संघ (पुचः)या ग्वसालय् बेकरी तालिम संचालन जूगु दु । वंगु आइतवाःनिसें शुरु जूगु तालिमया समाजया मूछ्याञ्जे सूर्य नकःमिं त्वाःदेवाय् मत च्याकाः यानादीगु खः ।

थीथी इलय् सीपमूलक तालिम संचालन याना वयाच्वंगु समाजं सुं नं मनू बेरोजगार जुया च्वनेम्वाःलेमा व स्वाबलम्बन जुइ फयेमा धइगु ल्याखं थुकथंया तालिम संचालन यानागु ज्याझ्वलय् जानकारी बिउगु दु ।

समाजया दुजःलिसें तालिम संयोजक महेश नकःमिं लसकुस यासें न्ह्याःगु ज्याझ्वलय् सल्लाहकार माणिकमान नकःमिं भिंतुना न्वचु तयादीगु खः ।

मुख्य प्रशिक्षक सजना नकःमिं तालिम बियाच्वनादीगु तालिमय् मुक्कं स्वीम्ह प्रशिक्षार्थीं ब्वति कयाच्वंगु समाजं जानकारी बिउगु दु ।

सानेपास्थित साथी श्रम प्रशिक्षण केन्द्रय् जुयाच्वंगु तालिमय् डोनट (क्रिम, चकलेट, कोकोनट, सादा), पाउरोटी, बन, हटडग बन, पिज्जा, ब्राउन केक, फ्रुट केक, कुकिज, क्रोसन, बर्थ डे केकलगायतया बेकरी ज्वलं दयेकेगु प्रशिक्षण बीगु व तालिम १०न्हुतक न्ह्याइगु नं समाजं जानकारी बिउगु दु ।