प्रज्ञा प्रतिष्ठानय् कविकेशरी ‘हृदय’या ११६ क्वःगु बुन्हि ज्याझ्वः

येँ(नेपालभाषा टाइम्स)- नेपालभाषा परिषद्या ग्वसालय् नेपाल प्रज्ञा प्रतिष्ठानया समन्वयय् कविकेशरी चित्तधर ‘हृदय’या ११६ क्वःगु बुन्हि हनेगु ज्या जुल । कविकेशरी ‘हृदय’या बुन्हिया लसताय् थीथी व्यक्तित्वपिंत सिरपाः लःल्हायेगु नापं वय्कःया व्यक्तित्व व कृतित्वयात कयाः प्रवचन ज्याझ्वः नं जूगु खः ।

चित्तधर ‘हृदय’या किपाय् स्वां देछासे न्ह्याःगु ज्याझ्वःया उलेज्या प्रतिष्ठानया कुलपति गंगाप्रसाद उपे्रतीं त्वाःदेवाय् मत च्याकाः यानादीगु खः । प्रतिष्ठानया सभाकक्षय् वंगु शुक्रवाः जूगु ज्याझ्वः प्रतिष्ठानया मातृभाषा विभाग (साहित्य)या विभागया प्रमुख लक्ष्मी मालीया सभापतित्वय् जूगु खःसा परिषद्या सदस्य सचिव पुष्परत्न तुलाधरं लसकुस यासें ज्याझ्वःया उद्देश्य बारे कनादीगु खः ।

ज्याझ्वलय् नेपालभाषाया नांजाःम्ह साहित्यकारलिसें समालोचक पूर्ण ताम्राकारं कविकेशरी चित्तधर ‘हृदय’या व्यक्तित्व व कृतित्वयात कयाः मू न्वचु तयादिसें भाषा, साहित्यया संरक्षण व उन्नतिया निंतिं पुनर्जागरणकालय् चित्तधर धर्मादित्य धर्माचार्य लिपाया प्रमुख व्यक्तित्व जूगु खँ कनादिल । लिसें वय्कलं चित्तधर छम्ह व्यक्ति मखसे संस्था जूगु व भाषा साहित्य ख्यःया निंतिं छगः धिसिलाःगु थां जूगु खँ कनादिल ।

प्रतिष्ठानया कुलपति उपे्रतीं नेपालभाषा नेपाःया थीथी भाषामध्ये उच्चस्तरया साहित्य च्वयातःगु छगू महत्वपूर्ण भाय् खः धयादिल । नेपालभाषाया आपालं स्रष्टातय्सं साहित्यया निंतिं योगदान बिउगु चर्चा यानादिसें नेपालय् नवाइगु थीथी भाय्या प्रवद्र्धन यायेगु ल्याखं प्रतिष्ठानं भाषा साहित्यय् योगदान बिउपिं अज्याःपिं विशिष्ट व्यक्तित्वत्य् जन्मजयन्तीया लसताय् वय्कःपिंत सम्मान यायेकथं पालंपाः थुकथंया ज्या याना वयाच्वनागु खँ कनादिल ।

ज्याझ्वलय् परिषद्पाखें लःल्हाना वयाच्वंगु थीथी सम्मान व सिरपाः नं लःल्हाःगु खः । परिषदं स्वँदय् छक्वः लःल्हायेगु याना वयाच्वंगु मानार्थ भाषा थुवाःया उपाधी भाषासेवा नापं कवि नविन चित्रकारयात लःल्हाःगु खः । कविकेशरी ‘हृदय’या हे नामं स्वनातःगु चित्तधर सिरपाः थुगुसी साहित्यकार डा. आनन्द जोशीयात लःल्हाःगु दु । थुगु सिरपाः नीन्याद्वः तका दांया खः ।

अथे हे नांजाम्ह निबन्धकार ठाकुरलाल मानन्धरया नामं स्वनातःगु झिंन्याद्वः तका दांया ठाकुरलाल सिरपाः साहित्यकार विमलप्रभा वज्राचार्ययात, झिद्वः तका दांया मोतिलक्ष्मी सिरपाः सरस्वति तुलाधर, झिद्वः तका दांया केशवलाल सिरपाः केदार सितु व झिंन्याद्वः तका दांया पूर्णहिरा सिरपाः कुन्दनप्रसाद श्रेष्ठयात लःल्हाःगु खः ।

प्रतिष्ठानया सदस्य सचिव प्रा. जगतप्रसाद उपाध्याय, पुरस्कृत व्यक्तित्वंपिं विमलप्रभा वज्राचार्य, कुन्दनप्रसाद श्रेष्ठं नं नुगःखँ तयादीगु ज्याझ्वलय् कविकेशरी हृदयं च्वयादीगु चिनाखँ परिषद्या ज्यासना पुचःया दुजः कवि श्रीराम श्रेष्ठं ब्वनाः न्यंकादीगु खः ।

ज्याझ्वलय् प्रतिष्ठानया उपकुलपति डा. जगमान गुरुङ, प्राज्ञ परिषद्या दुजःपिं मोदनाथ प्रश्रित, प्रा. दिनेशराज पन्त, योगेन्द्रप्रसाद यादव, डा. उपा ठाकु, माया ठकुरी, ध्रुव मधिकःमि, नेपालभाषा परिषद्या सदस्य सचिव पुष्परत्न तुलाधरलिसें आपालं भाषा व साहित्यह्यमिपिनिगु उपस्थिति दुगु खः ।